هەرێم نیوز
میدیایەكی عێراقی رای دەگەیەنێت كە حكوومەتی فیدراڵیی عێراق پاش ئەوەی لیستی فەرمانبەرانی خانەنشینكراوی پێ گەیشت، مووچەی مووچەخۆرانی هەرێمی كوردستان دەنێرێت.
پێگەی (بغداد الیوم) لە زاری سەرچاوەیەكەوە بڵاوی كردەوە، وەزارەتی دارایی عێراق چاوەڕوانە لیستی سەرجەم ئەو فەرمانبەرانەی بۆ بنێردرێت كە خانەنشین كراون.
هەروەك ئەوەشی ئاشكرا كردووە كە چاوەڕوان دەكرێت لە ئاییندەیەكی نزیكدا حكوومەتی هەرێمی كوردستان لیستەكانی مووچە و ئەو كەسانەی كە خانەنشین دەكرێن، رەوانەی بەغدا بكات، پاشان وەزارەتی دارایی عێراق مووچەی فەرمانبەرانی كوردستان دەنێرێت.
بەپێی ئەو ماڵپەڕە بێت، لە دوورترین حاڵەتدا، تا 10ی شوباتی 2025، مووچە دەنێردرێت.
ئەمە لە كاتێكدایە كە وەزارەتی دارایی عێراق لە هیچ بارودۆخێكدا بۆ رۆژێكیش مووچەی مووچەخۆرانی عێراق دوا ناخات، كەچی ئامادە نییە بڕیاری دادگای فیدراڵیی عێراق جێبەجێ بكات و مانگانە مووچەی مووچەخۆرانی هەرێمی كوردستان لە كاتی خۆیدا بنێرێت، بەڵكوو هەر مانگەی بە پاساوێك، ناردنی مووچە بۆ كوردستان دوا دەخات.