هەرێم نیوز
لە چوارچێوەی هەوڵەکانی کابینەی نۆیەم بۆ کەمکردنەوەی کاریگەرییەکانی وشکەساڵی و زیادکردنی ئاوی ژێر زەوی، مەسرور بارزانی، سەرۆکی حکومەتی هەرێم پرۆژەی بەنداوی بەستۆرە دەکاتەوە.
كاتژمێر 10ی به‌یانیی ئه‌مڕۆ دووشه‌ممه، 14ی 10ی 2024، مەسرور بارزانی، سەرۆکی حکوومەتی هەرێمی کوردستان، بەنداوی بەستۆڕە دەکاتەوە.
به‌نداوه‌كه توانای لەخۆگرتنی 20 ملیۆن مەتر سێجا ئاوی هەیە و دەبێتە ناوچەیەکی گەشتیاری و سەرچاوەیەکی گرنگ بۆ گەشەکردنی بەرهەمی ماسی. پرۆژەی بەنداوی بەستۆرە لایەن کۆمپانیایەکی ناوخۆییەوە جێبەجێ کراوە، هەلی کاری بۆ 150 کەس ڕەخساندووە و بە شەو و ڕۆژ کاری تێدا کراوە بەرزییەکەی 30 مەترە و پانییەکەی 180 مەترە، درێژییەکەشی دەگاتە630 مه‌تر و لە سەرەتای بارانبارینی ساڵی 2023 باراناوی تێدا کۆ دەکرێتەوە.
ئەم بەنداوە سوودی زۆری بۆ جوانترکردنی سروشتی ناوچەکە هەیە و دەبێتە هۆی سەرنجڕاکێشانی گەشتیاران و قازانج بۆ دانیشتووانی ناوچەکە، هەروەها کاریگەرییەکانی مەترسی درووستبوونی لافاو و زیانگەیاندن بە گوند و شاردێ و شارۆچکەکانی دەورووبەری ناوچەکە کەمدەکاتەوە.
لە هەرێمی کوردستان 34 بەنداوی گەورە، مامناوەند و بچووك هەن، تەنیا لە کابینەی نۆیەمی حکوومەتی هەرێمی کوردستان، شەش بەنداو (چەمرگە، خنس، دێوانە، تووڕەجار، ئاقووبان و شەوگێڕ تەواو کراون) و ئەمڕۆکەش بە کردنەوەی بەنداوی بەستۆڕە دەبێتە حەوت بەنداو و بڕیارە تاوەکوو پێش کۆتایی ئەم ساڵ کارەکانی بەنداوی گۆمەسپانیش کۆتایی دێت.
ئەمەش لە کاتێکدایە، ڕۆژی 24ی6ی2023 بەردی بناغەی بەنداوی بەستۆرە لەلایەن مەسرور بارزانی، وەک بەشێک لە ستراتیژی و پلانی حکومەتی هەرێمی کوردستان بۆ دابینکردنی ئاسایشی خوراک دانراوە.