هەرێم نیوز

بەرپرسی لقی سێی پارتی داوا دەکات تاوەکو دۆخی کەرکووک ئاسایی دەکرێتەوە سەرژمێری دوابخرێت، لەپاڵ ئەمەشدا داوا لە ئاوارەکانی نیشتەجێی هەرێمی کوردستان دەکات بگەڕێنەوە ناوچەکانیان و خۆیان تۆمار بکەن.

محەممەد کەمال بەرپرسی لقی سێی پارتی دیموکراتی کوردستان لە کۆنفرانسێکی ڕۆژنامەوانیدا داوای دواخستنی پرۆسەی سەرژمێری کرد بۆ دوای جێبەجێکردنی  ماددەی 140 کرد.

راشیگەیاند:  دەبوایە پەلە نەکرێت و دۆخی کەرکووک ئاسایی بکرێتەوە ئەوسا پرۆسەی سەرژمێریی گشتیی دانیشتووان لەم پارێزگایە بکرایە، هەربۆیە داوا دەکەین ئەم پرۆسەیە دوا بخرێت و پەلە لە جێبەجێ کردنی نەکرێت، چونکە ماددەی 140 جێبەجێ نەکراوە.

 ئاماژەی دا، بە گوێرەی ڕێکار و ڕینماییەکانی سەرژمێری گشتیی لە خانوویەکدا دەرفەت هەیە سێ خێزان خۆیان تۆمار و ناونووس بکەن، گوتیشی: هاووڵاتییانی ئاوارە دەتوانن بگەڕێنەوە و لە ماڵە خزمەکانیان خۆیان تۆمار بکەن.

محەمەدكەمال، وتیشی: دەبێت خەڵكی ناوچە كوردستانیەكان پێش (5)ی (10) خۆیان ناونوس بكەن و داوایان لێدەكەین بگەڕێنەوە و عەرەب بە لێشاو خۆیان لە ناوچە كوردستانییەكان تۆماردەكەن.

هەروا دەربارەی پرۆسەی تەعریب، ڕایگەیاند:  گوندی زەرتک تاوەکوو ساڵی 1988 کە خاپوور کرا یەک ماڵە عەرەبی تێدا نەبوو، بەڵام ئێستا لە قۆناغی گەمارۆ و ژمارە لێدانی پرۆسەی سەرژمێری نزیکەی 28 ماڵە عەرەب و هەشت ماڵی کوردی تێدا تۆمارکراوە، لە کاتێکدا زیاتر لە 250 خێزانی ڕەسەنی خەڵکی ئەو گوندە لە ناوچەکانی کوردستان پەرشوبڵاو بوونە و خەڵکی عەرەب لە جێگەی ئەوان تۆمارکراون، ئەمەش مەترسییەکانی سەرژمێری گشتییە.

ئەمەش لە کاتێکدایە، بڕیارە لە 20ی 11ی 2024  سەرژمێری گشتی دانیشتووان لە سەرتاسەری عێراق و هەرێمی کوردستان بکرێت و ئێستا قۆناغی یەکەمی دەستپێکردووە.