هەرێم نیوز
پلاتفۆڕمی دابڕان ڕایگەیاند، ڕۆژی ڕەشی پێنجی ئەیلول، دابڕانێکی تری تێڕامانە لە باوەڕی بەڕبەڕیخوازیی.
دەقی ڕاگەیەندراوەکەی پلاتفۆڕمی دابڕان:
ڕایەگەیەنراوی (پلاتفۆڕمی دابڕان)
ڕۆژی ڕەشی (٥)ی ئەیلول، دابڕانێکی تری تێڕامانە لە باوەڕی بەڕبەڕیخوازیی..
پلاتفۆڕمی دابڕان لەمیانی (١٠) ساڵ مێژووی مەدەنییەت و خەباتی خواستە سەردەمییەکانیدا، بێ لە چاندنی چەمکە چارەنوسسازەکان، بێ لە ئاوڕدانەوە لە ئاداب و ئەندێشەی ئازادیخوازیی، بێ لە سەنگەری سیستەمێکی دادپەروەر و دنیابینییەکی هەقخواز، هیچ هەنگاوێکی بە پێچەوانەی پەیامی ڕۆشنگەرییەوە نەناوە. دابڕان دنیابینییەکی سەردەمیانە و سیمایەکی نوێی ناو نەریتە کۆمەڵایەتی و کلتورییەکەی کوردستانە. ویستوویەتی ویژدانی مرۆڤبوونمان بدوێنێت و باوەڕبوون بە عەقڵی ئازاد و ڕەخنە و ڕۆشنگەریی بکاتە فەرهەنگ و فەلسەفەی ژیانی کۆمەڵایەتی و سیاسیمان. دابڕان لە گۆشەنیگای گۆڕانکاریی بەرەو بابەتیبوون، لە زەمینەی دابڕانی زانستی و زمانی ڕەخنە و جوانییەکانی جیاوازییەوە سەکۆیەکی دامەزراندبوو. لەو سەکۆیەدا لەوپەڕی ڕاست و ئاینییەوە تا ئەمپەڕی چەپ و سیکیۆلار شوێنی تێدا دەبوویەوە. ڕاسپاردەی حەوت کۆنفڕانسی نێودەوڵەتی دابڕان تەنهاوتەنها ڕاسپاردەی پەروەدەیی و ڕۆشنگەریی کوردەواریی بوون. خولە ڕۆشنگەرییەکانی دابڕان تەنهاو تەنها خولی خێزانی و خەسڵەتی ئەخلاقێکی خاوێنی مرۆڤانەو دەستگرتن بوون بە بەها و باوەڕی ئاینییەوە، بۆیە دابڕان دنیابینیەک بوو دژی کەلتووری (هەڵمەتە سیلاح)، دژی فەرهەنگی هەڵکوتان و هێز، دژی سەپاندن و بازرگانیکردن بە بەندایەتی و باوەڕی کوردەوارییەوە..
ئێمە وەک پلاتفۆڕمی دابڕان، لە ڕاگەیاندنمانەوە تاوەکو ڕۆژی ڕەشی (٥)ی ئەیلول، ڕۆژی هەڵکوتانە سەر سەکۆی جیاوازی، ڕۆژی قۆڵبەستکردنی چیرۆک و خەیاڵ و زمان و ئەدەب، ڕۆژی شکاندنی دەرگای شیعر و ئەرشیفی ڤیستیڤاڵەکان، ڕۆژی ڕەشی کوژاندنەوەی ڕووناکیی و ڕەخنە، بەدەنگی بەرز، لە پایتەختی ڕۆشنبیرییەوە، بەوپەڕی شانازییەوە، وەک چۆن بووین بە ئاسۆی داهێنان و فەرهەنگی ئەم شارە، وەک چۆن بووین بە ڕووی سووری جوانیەکانی مێژووی شار، ئاوەهاش فەرهەنگی فەوزا و فەرهوود، فەلسەفەی هەڵکوتان و دەرگا شکاندن دەدەینە دوواوە و دەمانەوێ بڵێین، ئێمە دابڕانی دنیای تاریک و نەریتی نوتەکین، دابڕانی ڕۆژی ڕەش و قۆناغێکی نوێی خەباتی مەدەنییەت و ئازادیخوازین.
٥ی ڕەشی ئەیلولی ٢٠٢٤
پلاتفۆڕمی دابڕان/سلێمانی