هەرێم نیوز
ئەمڕۆ دوشەممە بە ئامادەبونی دەیان سەرۆک، پادشا و سەرکردەی وڵاتانی جیهان و ئەندامانی بنەماڵەی شاهانە، شاژنە ئێلیزابێسی دوەم، شاژنی کۆچکردوی بریتانیا لە مەراسیمێکی مێژوییدا لە لەندەن خاکدەسپێردرێت.
لە چوار رۆژی رابردودا سەدان هەزار کەس تاجە گوڵینەی رێز و وەفایان لەبەردەم تابوتی شاژنە ئێلیزابێسی دوەم لە کڵێسای وێستمێنستر دانا کە ماوە درێژترین تەختنشینی بریتانیا بو لەمێژودا، ئەو مەراسیمەش لە بەیانی ئەمڕۆدا کۆتایی دێت.
لە مەراسیمی ماڵئاوایی لە شاژنی بریتانیا، زیاتر لە هەزار سەرۆک و کەسایەتی جیهانی بەشداربوان لەوانەش جۆو بایدن سەرۆکی ئەمریکا، نارو هیتۆ پادشای ژاپۆن و وانگ کیشان، جێگری سەرۆکی چین.
کاتژمێر 09:35ی بەیانی ئەمڕۆ بە کاتی لەندەن تابوتی شاژنە ئێلیزابێسی دوەم لەلایەن هێزی دەریایی شاهانەوە لە کڵێسای وێستمێنستر دەگوازرێتەوە، دواتریش لە کاتژمێر 7:30 خولەکی شەودا لە قەڵای ویندسۆر لە لەندەنی پایتەخت لە تەنیشت گۆڕی شازادە فیلیپی هاوسەری بەخاک دەسپێردرێت.
کاتژمێر 10:00ی بەیانی ئەمڕۆ دوایین قۆناغی رێوڕەسمی ماڵئاوایی لە تابوتی شاژن دەستپێدەکات و هەریەک لە سەرۆکی کەنیسەی وێستمێنستر، لیز ترەس سەرۆک وەزیران و ئەمینداری گشتی وڵاتانی کۆمۆنوێڵس یاوەری دەکەن، کاتژمێر 11:00ش مەراسیمەکە بە سرودی نیشتیمانی کۆتایی دێت، دواتریش تابوتی شاژن دەبرێت بۆ ناوچەی وێڵینگتۆن لە ناوەڕاستی لەندەن و بە سەدان هەزار کەس بۆ بەڕێکردنی تەرمی شاژن لەسەر شەقامەکان دەوەستن.
کاتژمێر 2:10ی دوانیوەڕۆ مەڕاسیمی ناشتن لە قەڵای ویندسۆر دەستپێدەکات و هەریەک لە چارڵزی سێیەم، پادشای نوێی بریتانیا و ئەندامانی دیکەی خێزانی شاهانە بەشداردەبن، کاتژمێر 3:00 پیاوانی کڵێسا پاڕانەوە و دواین ماڵئاوایی لە شاژن دەکەن و کەسی یەکەمی ئەو وڵاتانەشی ئێلیزابێسی دوەم شاژنیان بوە ئامادە دەبن.
پێش دوایین مەڕاسیمی ناشتنی تابوتی شاژن، تاجی شاهانە لەسەر تابوتی شاژن لادەدرێت و لەسەر شوێنێکی تایبەت لە قەڵاکە دادەنرێت، دواتریش سەرۆکی کڵێسا سرودێک دەخوێنێتەوە و پیرۆزبایی لە پادشای نوێ دەکات، لەو کاتەشەوە ماوەی ماتەمینی لە بریتانیا کۆتایی دێت، لەگەڵ ئەوەشدا ماتەمینی خێزانی شاژانە تا حەوت رۆژی دیکەش بەردەوامی دەبێت.