یەكەم: رەجەب تەییب ئەردۆغان، بەرنامەیەكی گرنگی ئابووریی لەگەڵ محەممەد شیمشەك، وەزیری دارایی و ئابووریی دانابوو، تا بتوانن لە ٢٠٢٦ هەڵاوسانی ئابووریی لە توركیا بۆ ٢٠٪ كەم بكەنەوە، هەروەها ریفۆرمێكی گەورەی ئابوورییان داڕێشتبوو، كە كاریگەریی دەبوو لەسەر رەوشی ئابووریی ئەو وڵاتە.

لێڤێنت گولتەكین، نووسەر و شڕۆڤەكاری سیاسیی پێی وایە، ئەردۆغان لەو پلانە ئابوورییەی داینابوو، بەئەگەرێكی زۆرەوە سەرەكەوتوو دەبوو، بەڵام دوای دەستگیركردنی ئیمامئۆغڵو، ئەو شانسەی لەدەستدا.

بەگوێرەی ئەو زانیارییانەی ئاژانسی (BBC) توركی بڵاوی كردووەتەوە، لە ماوەی پێنج رۆژی رابردوودا، بانكی ناوەندی توركیا، بۆ رێگری كردن لە دابەزینی بەهای لیرەی توركی، ٢٦ ملیار دۆلاری خستوەتە بازاڕەوە، واتە ئەو پارەیەی خستە بازاڕەوە بە زیانێكی زۆر فرۆشتویەتییەوە، تا بتوانێت لیرەی توركی بەرامبەر بە دۆلار رابگرێت و لەوە زیاتر نەیەتە خوارەوە، ئەمەش كاریگەریی تەواوی لەسەر ئابووریی توركیا دەبێت و ئەستەمە بتوانن پلانەكەیان بۆ ٢٠٢٦ جێبەجێ بكەن. واتە دەستگیركردنی ئیملمئۆغڵو، زیانی گەورەی ئابووریی لە توركیا بەدوای خۆی دەهێنێت.

دووەم: لەدوای هەڵبژاردنی سەرۆكایەتیی ٢٠٢٣، ئەردۆغان جگە لەوەی توانی هەڵبژاردن بباتەوە، توانی ئۆپۆزسیۆنی توركیا لەت بكات و پەرتیان بكات. بۆ نموونە هاوپەیمانیی (میللەت) كە لە نێوان پارتە ئۆپۆزسیۆنەكان دروست ببوو هەڵوەشایەوە، ئەمەش شانسی ئەردۆغانی بەرز كردەوە تا ماوەیەكی زۆر ئۆپۆزسیۆن نەیەتەوە سەر خۆی، بەڵام بەدەستگیركردنی ئیمامئۆغڵو، ئۆپۆزسیۆنی یەك خستەوە.

هەموو پارتە ئۆپۆزسیۆنەكانی توركیا، پاڵپشتی لە ئیمامئۆغڵو دەكەن و لەگەڵ جەهەپە ئامادەی خۆپیشاندانن، ئەمەش بەو مانایە دێت، ئۆپۆزسیۆن دژی ئاكەپە و ئەردۆغان یەكیان گرتووە، تەنانەت ئەو باڵەی لەناو جەهەپەدا دژی ئۆزگوور ئۆزەل، سەرۆكی جەهەپە و ئیمامئۆغڵو بوون، هاتوونەتەوە ریزی جەهەپە و پشتگیری خۆیان بۆ ئیمامئۆغڵو دوپاتكردوەتەوە، لەورووەوە ئەردۆغان زیانی پێدەگات، چونكە چەندە ئۆپۆزسیۆن یەكگرتوو بێت، باری ئەردۆغان گران دەبێت بۆ بردنەوە لە هەڵبژاردنیی سەرۆكایەتیی.

سێیەم: دوای دەستگیركردنی ئیمامئۆغڵو و ئەو كاردانەوە ناوەخۆییەی دروست بوو، ئەردۆغان ناتوانێت هەنگاو بەرەو دواوە بنێت، بەمەش زیاتر توند دەبێت و زیاتر دژی ئۆپۆزسیۆن دەوەستێتەوە.
لێكۆلەرانی سیاسی پێیانوایە، ئەردۆغان ناتوانێت بڵێت ئیمامئۆغڵو ئازاد بكەن، چونكە ئەگەر ئەو بڕیارە بدات، ئیمامئۆغڵو وەكوو پاڵەوانێك لە زیندان دێتە دەرەوە، ئەمەش بۆ ئەردۆغان و ئاكەپە باش نابێت و كاریگەریی لەسەر هەڵبژاردن دەبێت، بۆیە دەستگیركردنی ئیمامئۆغڵو، بووەتە هۆی ئەوەی ئەردۆغان هەنگاو بۆ دواوە نەنێت و پاڵی پێوە دەنێت زیاتر توند بێت، بەمەش زیاتر لە دیموكراتی دوور دەكەوێتەوە و پشێوی زیاتر دروست دەبێت.

چوارەم: دەستگیركردنی ئیمامئۆغڵو، میدیاكانی ئەورووپای هێنایە دەنگ، بەوەی ئەردۆغان ناتوانێت بەشێوەیەكی ئاسایی هەڵبژاردن بباتەوە، بۆیە ركابەرەكەی خستوەتە زیندان.

ئەردۆغان كە چارەگە سەدەیەكە بەشداری هەر هەڵبژاردنێكی كردبێت سەركەوتوو بووە تێیدا، بە دەستگیركردنی ئیمامئۆغڵو، نیشانیدا كە ئیدی ناتوانێت هەڵبژاردن بباتەوە، ئەمەش كاریگەریی خراپ لەسەر دەنگدەر دروست دەكات. هەروەها پشتڕاستی كردەوە، كە ئیدی ناتوانێت لە هەڵبژاردندا كورسی سەرۆكایەتیی بباتەوە، بۆیە رێگەی تر تاقی دەكاتەوە، كە دژی دیموكراتی و ئازادی تاكە، ئەمەش بۆ ئاكەپە و ئەردۆغان خراپە.

لەلایەكی ترەوە، ئەگەر سەیری میدیای ئاكەپە و بەرپرسانی ئەو پارتە بكەیت، پێیانوایە دەستگیركردنی ئیمامئۆغڵو یاساییە، گەندەڵی كردووە و دەبێت تیشك بخرێتە سەر ئەو لایەنە، چونكە ناكرێت پرسە یاساییەكان بە سیاسی بكرێت. پێشیانوایە، ئەردۆغان لە ئیمامئۆغڵو ناترسێت بۆ هەڵبژاردنی داهاتوو، بەڵام دەستیش لەكاروباری داگا وەرنادات.