پێشنیار كراوە ئۆجەلان ئازاد بكرێت و لە هەولێر نیشتەجێ بێت
هەنگاوی پرسی چارەسەری بە خێرایی دەڕوات بەڕێوە، وەكوو ئەوەی لە میدیاكانی توركیاوە باسی لێوە دەكرێت، ئەمجارەیان حكوومەت جیدییە لە چارەسەركردنی پرسی كورد، بەڵام بەشێوەیەكە هەردوولا قازانج و زەرەری تێدا بكەن.
چەند نووسەر و شڕۆڤەكاری سیاسی باس لەوە دەكەن، مادام دەوڵەت باخچەلی هاتووەتە ناو پڕۆسەكەوە، كەواتە مەیلی جیدی هەیە بۆ نزیك بوونەوە لە كورد، بەڵام ئەمجارەیان لە بری ئەوەی پەكەكە بهێنرێتە ناو پڕۆسەكەوە، عەبدوڵا ئۆجەلان و دەم پارتی دەهێنرێنە ناو پڕۆسەكەوە.
یاڵچن دۆغان، نووسەری دیاری توركیا، پێیوایە ئەمجارەیان فێڵ لە كورد دەكرێت، دەیانەوێت بۆ نووسینەوەی دەستووری تازە، دەنگی دەم پارتی بەدەست بهێنن، لە بەرامبەردا یان ئۆجەلان، یان سەلاحەدین دەمیرتاش ئازاد بكرێت.
رۆژنامەی (ئایدنلیك)ی توركی، لەسەر زاری ئیبراهیم خەلیل باران، نووسەری دیاری باكووری كوردستان، ئەو مادانەی ئاشكرا دەكات، كە ئۆجەلان و حكوومەتی توركیا لەسەری رێككەوتوون، بەڵام دەكرێت گۆڕانكاری تێدا بكرێت. ئەوەی ئەو باسی دەكات ٦٠ مادەیە، بەڵام چەند مادەیەكی دزەی كردووەتە ناو میدیاكان.
مادەكان ئەمانەی خوارەوەن:
١. لە نەورۆزی ٢٠٢٥، واتە ٢١ی٣ی عەبدوڵا ئۆجەلان ئازاد بكرێت.
٢. قەدەغەی سیاسەتكردن لەسەر ئۆجەلان دادەنرێت.
٣. پێویستە دەم پارتی، بیرۆكەی ئۆجەلان جێبەجێ بكات، كە ببێت بە پارتێكی توركیایی.
٤. ئەگەر ئۆجەلان نەیویست لە شوێنێكی توركیا نیشتەجێ بێت، پێشنیاری بۆ دەكەن بچێتە هەولێر و لەوێ نیشتەجێ بێت.
٥. لەناو پەكەكەدا ٨٨ كەسایەتی سزای قەدەغەكردنی سیاسەتیان لەسەر جێبەجێ دەكرێت و بۆیان نییە بگەڕێنەوە بۆ توركیا.
٦. پێشنیار دەكرێت، لەناو ئەو رێژەیەدا ٣٤ كەسیان لەگەڵ ئۆجەلاندا لە هەولێر نیشتەجێ بن.
٧. ئەوانی تر پێشنیاریان بۆ دەكرێت لە یۆنان یان نەرویژ بژین.
٨. ئەوانەی سزای توندیان بەسەردا سەپێنراوە، وەكوو سزای بەندكردنی هەتا هەتایی، سزاكەیان كەم بێتەوە بۆ ٢٠ ساڵ.
٩.لە هەموو شارەوانییەكانی باكووری كوردستان، دوو زمان بەفەرمی دەناسرێت، توركی و كوردی.
١٠. شارەوانییەكان زۆر بەهێز دەكرێن.
١١.هەموو پارتە كوردییەكان، لەناو پارتی ناوچەیی دیموكراتەكاندا كۆ دەكرێنەوە و وەكوو پارتی كورد بناسرێن.
١٢. پێویستە رۆژئاوا لەلایەن توركیاوە بناسرێت.
١٣. مەزڵوم عەبدی لە سەرۆكی پەیەدا لابدرێت و كوسێكی تر لە شوێنی دابنرێت.
١٤. پێویستە سوپای سووریای دیموكرات و سوپای سووریای ئازاد یەك بگرن و لەژێر دەسەڵاتی توركیادا بن، ئەگەر نەهاتنە ژێر باری ئەوەی لەگەڵ سوپای سووریای ئازاددا یەك بگرن، ئەوكات لەچوارچێوەی میساقی میللی، دەبێت پێكهاتەی ئەو هێزە بوونی هەبێت. ئەگەر ئەمەش رووی نەدا، ئەوكات دەبێت سوپای سووریای دیموكرات، لەگەڵ سوپای بەشار ئەسەد یەك بگرێت.
١٥.چاوەڕێش دەكرێت، ئۆجەلان داوا بكات، پەكەكە بەتەواوی چەك دابنێت و وەكوو هێزێكی چەكداری كۆتایی پێبێت.
بەگوێرەی زانیارییەكان، ئەو مادانە، مەرج نییە هەموو جێبەجێ بكرێت، بەڵكوو پێشنیار كراوە و گفتوگۆی چڕی لەسەر دەكرێت، ئەوەی گرنگە، هەر مادەیەك، یان هەر پڕۆژە پێشنیارێكی تر بوونی هەبێت، لەناو پەرلەمانی توركیا بەیاسایی دەكرێت.