بەزمانێکی سادەو ڕوون ئەو قاڵە قاڵ و دەنگە دەنگە بێ پرۆژەیەی لە ئێستادا لە هەرێمی کوردستان سەرپێ کەوتوەو ناوی لێنراوە ئۆپۆزسیۆن بە پێوەری زانستی ناتوانین پێی بڵێین ئۆپۆزسیۆن، بەڵکو ئەوەی هەیە زیاتر هاتو هاوارێکی ئیعلامی نا ڕێکخراو و بێ پرۆژەیەو سواری شەپۆلی ناڕەزایەتی جەماوەر بوە.
ئۆپۆزسیۆنی ڕاستەقینە، ئەبێ خاوەن بەرنامەو پلان و دونیابینی تایبەت بە خۆی بێ و چارەسەری گونجاوی پێ بێت بۆ هەموو کێشەو ئاریشەکانی کۆمەڵگا، ئەبێ بەرامبەر هەموو ناڕێکی و خواریەکانی دەسەڵات پرۆژەی بەدیل و جێگرەوەی هەبێ و ببێتە وەڵامگۆی ڕاستەقینە بۆ داخوازیەکانی جەماوەر.
لە کاتی قەیران و کێشەکاندا بەرپرسیارانە مامەڵە بکات و شان بداتە ژێر بارە قورسەکان.
لەهەمان کاتا ئەبێ بەرژەوەندیە باڵاکانی گەل و نیشتمان پێش بەرژەوەندیە کەسی و حیزبیەکانی خۆی بخات و خەمی هاووڵاتی خەمی لە پێشینەی بێت.
ئۆپۆزسیۆنی ڕاستەقینە نابێ خۆی سەرقاڵ بکات بە شەڕی لابەلای ئایدۆلۆژی و حیزبیەوە، ئەبێ دورکەوێتەوە لە موزایەداتی سیاسی و بەکردەیی دڵسۆزیی خۆی بۆ جەماوەر بسەلمێنێت، لەخۆ بوردوانە و بەنەفەسێکی
درێژەوە بێتە مەیدان و واقیعیانە لەگەڵ پێشهاتەکاندا مامەڵە بکات، دورکەوێتەوە لە سۆز و عاتیفەگەرایی، خۆی قەتیس نەکات لە چوارچێوەی کۆمەڵێ دروشمی پۆپۆلیستی و ڕوکەشداو خەڵکیان پێوە سەرقاڵ بکات.
ناکرێت دەست بەرداری پرسە گرنگ و ستراتیجیەکان بێت، بەتایبەت ئەو پرسانەی بوعدێکی نیشتیمانی و نەتەوەییان هەیەو بە جێیان بهێڵێ بۆ حیزبە دەسەڵاتدارەکان، تا ئەوان خۆیانی لێبکەن بە خاوەن، هەڵەێکی کوشندەیە بۆ دژایەتی ئەوان سەنگەر لەو پرسانە بگرێت و بەپرسی سەرەکی خۆی نەزانێت، چونکە ئەمانە پرسی حیزبی نین، بەڵکو پرسی نەتەوەێکی ژێر دەستەو (چل بۆ پەنجا) ملیۆن کەسیەو سازش لێکردنیان ئینتحاری سیاسیە، ئەگەر بەهۆی کۆمەڵێ گرفتی ناوخۆی وەک گەندەڵی و ئیدارەدانی خراپەوە بۆ ماوەێکی کاتی پرسیاریان لەسەر دروست بوبێت ئەمە ناکاتە ئەوەی وازیان لێ بهێنرێت و بۆ هەتا هەتایە دەسبەرداریان ببیت.
هەر بۆیە لەگەڵ بوونی ئەو هەموو کێشە و قەیران و نادادی و خراپ ئیدارەدان و بەفیڕۆدانی سامانی گشتیەداو لەگەڵ بوونی ئەو پانتایە فراوانەی ناڕەزایەتی کەزۆربەی چین و توێژەکانی کۆمەڵگای گرتۆتەوە، نەیتوانیوە متمانەی جەماوەر بەدەست بێنێت و ببێتە جێی ئومێدیان، نەیتوانیوە وەک ئەلتەرناتیڤێکی حەقیقی خۆی نمایش بکات و زۆرینەی جەماوەر پشتی بگرێت.
ئۆپۆزسیۆنی ڕاستەقینە تەنها کاری دەرخستنی گەندەڵی و وروژاندن و هەڵا دروستکردن نیە لەسەر کێشەو ئاریشەکان، بەڵکو، لەپاڵ دەرخستنی کێشەکان کاریشی هەڵگرتنی بەر‌پرسیاریەتی و ڕوبەڕو بونەوە و دەستەویەخە وەستانە لەگەڵیان، کە ئەمە خۆی بۆ خۆی پێویستی بە نەخشە و پلانی گونجاو و حەکیمانە هەیە، نەک پەنا بردن بۆ چەلەحانێ و شەڕە جنێو و موزایەداتی سیاسی بێ بەرهەم و دوبارەکردنەوەی هەمان ڕەفتاری حیزبەکانی پێش خۆی، کە هیچ خزمەتێک بە هاووڵاتی ناکات، بگرە زۆر جار کێشەکانیشی بۆ ئاڵۆزتر و قوڵتر دەکاتەوەو بەرەو کەشێکی دەروونی نائارام و خراپی دەبات.
ڕاستکردنەوەی ئەو هەڵە تێگەیشتنە لە چەمکی (ئۆپۆزسیۆن) لە زیهنیەتی تاک و کۆمەڵگای کوردی و حیزبی کوردیدا پێویستێکی هەنوکەیی و ئەرکێکی ئەخلاقیە، بۆیە پێویستە ڕۆشنبیران و کەسانی دڵسۆزی خاوەن فیکر ئەو ئەرکە لە ئەستۆ بگرن و لەوە زیاتر باری سەرشانی هاووڵاتی قورس نەکەن و بە گوتاری بێ ناوەڕۆک و لاواز هاووڵاتی چەواشە نەکەن و سەری لێ نەشێوێنن.
ئەرکی هاوڵاتیشە قوڵتر پێشهاتەکان بخوێنێتەوەو دروشمە پۆپۆلیستیەکان بەجێبهێڵێ و خۆی ئاشنا بکات بە مافەکانی و دوای قسەی بێ ناوەڕۆک و هات و هاواری بێ ئەنجام نەکەوێت.
لە ئێستادا کاتی قیژە قیژ و دەنگ بەرز کردنەوە بەسەر چوەو ئەوەی گوێی لێئەگیرێ قسەی ویژدان و عەقڵ و لۆژیکە ، بە تایبەت لەم سەرو بەندە دژوارەدا کە ناوچەکە سیخناخە بە سەدان کێشە و قەیرانی گەورە گەورە.
بۆیە دروستبونی ئۆپۆزسیۆنێکی نیشتمانی و خاوەن ڕوئیا کە هەڵگری خەمی خاک و خەڵک بێت پێویستترین ئەرکی قۆناغەکەیە، کە واقیعیانە دەست بخاتە سەر برینەکان و بە عەقڵێکی کراوەو سەردەمیانەوە مامەڵە لەگەڵ پێشهاتە نوێ یەکاندا بکات و وەک هێڵی سێیەم خۆی بناسێنێ.