لە هەنگاوێكی چاوەڕواننەكراودا، مەزڵووم عەبدی، سەرۆكی فەرماندەی هێزەچەكدارەكانی هەسەدە، لەگەڵ ئەحمەد شەرع، سەركۆماری سووریای راگوزەر، رێككەوتنێكی هەشت خاڵیان ئیمزا كرد، ئەم رێككەوتنە كاردانەوەی گەورەی لە میدیا ناوەخۆیی و جیهان بەدوای خۆیدا هێنا. بەشێكی زۆر لە سیاسی و شرۆڤەكاران پێیانوایە، لەم ساتەدا رێككەوتنەكە زۆر گرنگ بوو، بەڵام بەشێكیش پێیانوایە، رەنگە ئەمە فێڵێكی تر بێت لە كورد و بیانەوێت كورد چەك بكەن.

وەكوو ئەوەی وتەبێژی هەسەدە باسی دەكات، رێككەوتنەكە بە ئاگاداری و لەسەر داوای ئەمریكا بووە، ئەم گوتەیە دڵی كوردی خۆش كرد و هەموو ئەوانەی پێشتر رەخنەیان لە رێككەوتنەكە گرت و گوتیان ئەگەر لایەنی سێیەم نەبێت بایەخی نییە، دووبارە بە بۆچوونەكانیاندا چوونەوە، بەڵام ئەو گومانە هەر هەیە، ئاخۆ ناوەڕۆكی رێككەوتنەكە چۆنە؟ ئایە هەسەدە هەر دەمێنێت، بەڵام سەر بە حكوومەتی سووریا دەبێت؟ یان هەڵدەوەشێتەوە و شتێك نامێنێت بەناوی هەسەدە.

حكوومەتی ئەحمەد شەرع، ئەگەر ١٠٠٪یش نەبێت، بەڵام بەڕادەیەكی زۆر لەژێر هەژموونی توركیادایە، بۆیە رێككەوتنێكی لەوشێوەیە لەگەڵ هەسەدە، كە توركیا بە تیرۆرستی دەزانێت، ئەستەمە توركیا ئاگای لێ نەبێت، ئەمە بۆ هەسەدەش راستە، كە ناتوانێت بەبێ ئەمریكا رێككەوتنێكی لەو شێوەیە لەگەڵ سووریادا ئەنجام بدات.

ئەمریكا دەیەوێت لەو هەنگاوە، ئەو ترسە لای توركیا بڕەوێنێتەوە كە سووریا دابەش نابێت و ترسی ئەوەتان نەبێت كورد لەوێ فیدڕاڵی پێبدرێت، هەروەها ئەو هێزەی تۆ بە تیرۆرستت دادەنا ئیدی سەر بە حكوومەتی سووریا دەبێت.

لەڤێنت گولتەكین، نووسەر و لێكۆڵەری تورك پێیوایە، ئەو قۆناغی پرسی چارەسەرییەی مەهەپە و ئاكەپە دەستیان پێكردووە، ئامانجە گەورەكە بۆ سووریایە، واتە لە توركیا ئیدی شتێك نامێنێت بەناوی پەكەكە، ترسی تیرۆر كۆتایی دێت، بەڵام بۆ سووریا بابەتەكە جیاوازە، لەوێ كورد دەبێتە خاوەن ستاتۆی خۆی و دەبێت توركیاش قبوڵی بێت.

ئەو بۆچوونەی گولتەكین، تا ئاستێكی زۆر راست دەرچووە، چونكە وەكوو ئەوەی هەسەدە باسی دەكات، رێككەوتنەكە بەو جۆرەیە، كە هەسەدە دەمێنێت و سەر بە وەزارەتی بەرگری سووریا دەبێت، هەروەها ناوچەی خۆسەریش هەر وەكوو خۆی دەمێنێتەوە، بەڵام فیدڕاڵی و خۆبەڕێوەبردن لەناو رێككەوتنەكەدا رەتكراوەتەوە.

وەكوو ئەوەی چاودێرانی سیاسی باسی دەكەن، قۆناغی داوی ئەو رێككەوتنە گرنگە، لەوێدا دەردەكەوێت ئاخۆ كورد بەشداری پێدەكەن لە پەرلەمان و حكوومەتدا، هەروەها ئەو دەستوورەی بڕیارە بنووسرێتەوە، ئایە كورد وەكوو نەتەوە دەناسێنن و زمانی كوردی دانی پێدا دەنرێت و هێزی هەسەدە بەفەرمی دەناسرێت؟ ئەمانە و دەیان پرسی گرنگی تر، دوای رێككەوتنەكە روون دەبێتەوە و دەست پێدەكات.

تاوەكوو ئێستا توركیا بێدەنگە و قسەی جیدی لەبارەی ئەو رێككەوتنە نەكردووە، بەڵام بەشێك لە چاودێرانی سیاسی پێیانوایە، گومان هەیە توركیا بیەوێت فێل لە كورد بكات، واتە ئەو پەیامەی عەبدوڵا ئۆجەلان، كە گوتبووی دەبێت پەكەكە و گروپەكانی درێژكراوەی پەكەكەش چەك دابنێن، ئەوە مەبەستی یەپەگەیە و بیانەوێت لە رێگەی رێككەوتنێكی لەو شێوەیە یەپەگە بتوێننەوە و ئیدی لە سووریا هێزی كورد بوونی نەمێنێت، بەڵام بەگوێرەی ئەو رێككەوتنە بێت، لە ماوەی ساڵێكدا دەبێت مادەكان جێبەجێ بكرێت، بۆیە روون دەبێتەوە ئاخۆ هەسەدە، كە بەشێكی سەرەكی ئەو هێزە سەر بە یەپەگەن هەڵدەوەشێتەوە؟ یاخود ئاخۆ هێزی سووریا دەچێتە رۆژئاوای كوردستان و پاراستنی ناوچەی خۆسەر وەردەگرن؟ ئەگەر ئەمە روو بدات، بەو واتایە دێت كە هەسەدە هەڵدەوەشێتەوە و كۆتایی پێدێت، گەر بەپێچەونەوە بێت، رێككەوتنەكە زۆر گرنگە و لەم كاتەدا بۆ پاراستنی كورد و رێگەگرتن لە شەڕی ناوەخۆ و پارێزگاریكردن لە ئیدارەی خۆسەر هەنگاوێكی گەورەیە.

ئەو مادانەی مەزڵووم عەبدی و ئەحمەد شەرع لەسەری رێككەووتون هەشت خاڵە و ئەمەی خوارەوە خاڵەكانە:

١. گەرەنتیكردنی مافی هەموو سوورییەكان لە نوێنەرایەتی و بەشداریكردن لە پڕۆسەی سیاسیدا و هەموو دامەزراوەكانی دەوڵەت لەسەر بنەمای لێهاتوویی بێ گوێدانە پاشخانە ئایینی و نەتەوەییەكانیان.

٢.كۆمەڵگەی كوردی كۆمەڵگەیەكی رەسەنە لە دەوڵەتی سووریادا و دەوڵەتی سووریا گەرەنتی مافی هاووڵاتی بوونی دەكات و هەموو مافە دەستوورییەكانی بۆ دابین دەكات.
٣.راگرتنی شەڕ لەسەرجەم خاكی سووریادا.

٤.تێكەڵكردنی هەموو دامەزراوە مەدەنی و سەربازییەكان لە باكووری رۆژهەڵاتی سووریادا لە چوارچێوەی ئیدارەی دەوڵەتی سووریادا، لە نێوانیاندا دەروازە سنوورییەكان و فڕۆكەخانە و كێڵگە نەوتی و گازییەكان.

٥.گەرەنتی گەڕانەوەی سەرجەم ئاوارە سوورییەكان بۆ شارۆچكە و گوندەكانیان و دابینكردنی پاراستیان لە لایەن دەوڵەتی سووریاوە.

٦. پشتیوانی دەوڵەتی سووریا لەڕووبەڕووبوونەوەی پاشماوەكانی ئەسەد و هەموو ئەو هەڕەشانەی كە هەڕەشە لە ئاساییش و یەكپارچەیی خاكەكەی دەكات.

٧. رەتكردنەوەی بانگەشەكانی دابەشبوون و رق و كینە و هەوڵدان بۆ بڵاوكردنەوەی ئاشووب لە نێوان هەموو پێكهاتەكانی كۆمەڵگەی سووریادا.

٨. لیژنە جێبەجێكارەكان كار دەكەن و هەوڵدەدەن بۆ جێبەجێكردنی رێككەوتنەكە و بەشێوەیەك كە لە كۆتایی ئەمساڵ تێنەپەڕێت.