رەنگە لە ماوەیەكی نزیكدا عەبدوڵا ئۆجەلان، داوا بكات پەكەكە چەك فڕێ بدات و ئیدی توركیا بەتەواوی لە پەكەكە رزگاری ببێت، بەڵام پێموانییە قەندیل، بەگوێی عەبدوڵا ئۆجەلان بكات بۆ فڕێدانی چەك، واتە فڕێدانی چەك بە بانگەوازێكی ئۆجەلان ناكرێت، ئەوەیشی پێی وابێت پەكەكە چەك دادەنێت، دیارە نە پەكەكەی ناسیوە و نە بەباشیش لە سیاسەتی ئەوان گەیشتووە.

كەسایەتی زۆر گرنگە بۆ هەر پارتێكی سیاسی، ئۆجەلان توانی سیستەمێكی گرنگ لەناو پەكەكە دروست بكات، بە دەستگیركردنیشی، پەكەكە هەر لەسەر ئەو سیستەمە بەردەوام بووە، بۆیە بە هاوكاری ئەمریكا توانی هەستێتەوە سەرپێی خۆی.

كاتێك ئۆجەلان دەستگیر كرا، پەكەكە لەڕووی سەربازی و مەعنەوییەوە زۆر لاواز بوو، ئەمریكا لەرێگەی رادەستكردنی ئۆجەلان بە توركیا، ویستی بە توركیا بڵێت، ئیدی ستراتیژییەتی سەربازی بۆ چارەسەری پرسی كورد بەكارمەهێنە و دەبێت ستراتیژییەتی دیبلۆماسی بەكاربهێنیت، بەڵام توركیا، رێگەی یەكەمی گرتە بەر، ئەمریكاش پەكەكەی زیندوو كردەوە.

بۆیە ئەگەر لایەنێك كاریگەریی لەسەر پەكەكە هەبێت تا چەك دابنێت، ئەمریكایە نەك ئۆجەلان، چونكە سەرەكیترین پاڵپشتی پەكەكە و یەپەگە ئەمریكایە، ئۆجەلان لە زینداندا پەیامەكانی لەلای قەندیل بەهای نییە، بەڵام وەكوو سەرۆكی خۆیان، دەیپەرستن.
ساكینە جانسز، یەكێك لە دامەزرێنەرانی پەكەكە، بەداخەوە لە پاریس لەگەڵ دوو هاوڕێی تیرۆر كرا، لە كتێبی (ژیانم هەمیشە تێكۆشان) بوو، كە سێ بەرگە و هەرسێ بەرگیم خوێندوەتەوە، باس لە ژیانی زیندان دەكات لە ئامەد، كە چی زۆڵم و ستەمێكیان لێكراوە. ئەو باس لە خەیری و كەمال پبیر دەكات، كە لە قاوشی سەرەوەی گرتوخانەی ئامەد دەستگیر كراون، بەهۆی ئەوەی ئەشكەنجەی زۆر دراون و بەشێوەیەكی دڕندانە لەگەڵیان جولاونەتەوە، ناچار بوونە هەندێك تەنازول بكەن، بۆ نموونە مارشی نەتەوەیی توركیایان گوتووەتەوە، هەروەها باسیان لە گرنگی توركیا كردووە، تەنانەت كاتێك لە مایكی زیندان قسەیان كردووە و ساكینە گوێی لێ بووە، كە خەیری چۆن داوا لە مانگرتوان دەكات مانگرتن بشكێنن، ساكینە لە خەفەتان دەگرییەت. پاشان هەر خەیری و پیر لە نامەیەكدا پێی دەڵێن، ئەوەیان بۆیە كردووە، تا بتوانن لەژیان بمێنن بۆ ئەوەی ورە بدەنە بەر زیندانیان تر، هەروەها لە زیندان هەر شتێكت پێ بكەن دژی میللەتی خۆت، ناچارییە و دەبێت پارت بزانێت ئەمە تەسلیمبوون نییە، ئەمە ناچارییە و یاخود دەكرێت بڵێین پلانێكی تەكنیكییە.

ئەمە بۆ ئۆجەلانیش راستە، لە زیندان هەر پەیامێك بنێرێت پەكەكە دەڵێت ناچارییە و لەژێر كاریگەریی دەوڵەتی توركە، بۆیە بەهانەیان هەیە جێبەجێی نەكەن.

دەبێت ئەوە بزانین، كاتی خۆی دەوڵەتی توركیا، داوای كرد كورد زمانی كورد فڕی بدات، ئەنجام قەدەغە لەسەر زمانی كوردی دانرا و ئێستاش لە توركیا كورد بۆی نییە بە زمانی دایك بخوێنێت. داوای ناسنامەی كوردیان كرد، ئەنجام لە تەسكەرە و پاسپۆرتی توركیادا، هەموو كوردێك وەكوو نەتەوەی تورك حیسابی بۆ كرا، داوایان كرد كورد و تورك ببێت بە برا، بەڵام هەمیشە تورك برا گەورە بووە، برا گەورەش هەركاتێك بیەوێت برای بچووكی خۆی پان كردووەتەوە.

پێم خۆشە و پاڵپشتی لەوە دەكەم كە پەكەكە چەك دابنێت، بەمەرجێك، لە دەستووری توركیادا كورد وەكوو نەتەوە بناسێنن، هەروەها رێگە بدەن كورد بەزمانی دایك بخوێنێت و لێبوردنی گشتیش بۆ زیندانییانی سیاسی دەربكرێت.

كورد لە توركیا دەبێت بزانێت، لەگەڵ تورك نابێتە برا، دەبێت بەدوای بەرژەوەندی میللەتی خۆی بكەوێت، ئەگەر ئەردۆغان، مافی كورد بدات و بەڵێنی ئەوە بدات كە رێگە دەدات كورد بەزمانی خۆی بخوێنێت، با دەست بخەنە ناو دەستی، بەپێچەوانەوە كورد و تورك وەكوو گۆشت و نینۆك وان، بەڵام گۆشتەكەی تورك بووە و نینۆكەكەش كورد، هەركات ویستبێتیان نینۆكەكەیان كورت كردووەتەوە، بۆیە ئیدی دەبێت كورد، رێگە لە بڕینی ئەو نینۆكە بگرێت.