هەرێم نیوز

محەمەد خالیدی، سەرکردە لە هاوپەیمانیی "ئاوەدانکردنەوە و گەشەپێدان" کە محەمەد شیاع سودانی سەرۆکایەتیی دەکات، ڕایگەیاند کە فراکسیۆنەکەیان بە نێوەندگیریی عەمار حەکیم لەگەڵ نوری مالیکی گەیشتوونەتە خاڵی هێورکردنەوەی گرژییەکانی نێوانیان، ئەوەش دوای کێبڕکێ و ئاڵۆزییە سیاسییەکانی نێوان هەردوولا.

هۆکاری گرژییەکان و لێدوانەکەی مەرسومی
گرژییەکانی نێوان هاوپەیمانیی دەوڵەتی یاسا و هاوپەیمانیی ئاوەدانکردنەوە و گەشەپێدان دوای ئەوە پەرەی سەند کە خالید ولید مەرسومی، ئەندامی مەکتەبی سیاسیی حزبی سودانی، داوای کردبوو نوری مالیکی دادگایی بکرێت بەهۆی کەوتنی پارێزگاکان بە دەستی گرووپە تیرۆریستییەکان لە ساڵی ۲۰۱٤دا، بۆ ئەوەش ببێتە پەند بۆ هەوانەی کۆمەڵگەیان وێران کردووە.

ئەمەش لە کاردانەوەی ئەو تۆمەتانەدا هات کە پێشتر پەرلەمانتارانی هاوپەیمانیی دەوڵەتی یاسا ئاراستەی سودانیان دەکرد، لە سەرووی هەمیشانەوە سکاڵاکەی پەرلەمانتار یوسف کێلابی لە دەسەڵاتی دادوەری دژی سودانی، کە تێیدا ناوبراوی بە گەندەڵی و هۆکاری سەرهەڵدانی قەیرانی ئابووریی ئێستای عێراق تۆمەتبار کردبوو.

داواکاریی لێکۆڵینەوە لە هەموو حکومەتەکانی ڕابردوو
لەبارەی هەڵوێستی هاوپەیمانییەکەیانەوە، محەمەد خالیدی ڕایگەیاند: "وەک هاوپەیمانیی ئاوەدانکردنەوە و گەشەپێدان داوا دەکەین پێداچوونەوە و وردبینییەکی گشتگیر بە هەموو حکومەتەکانی ڕابردوودا بکرێت، و دەمانەوێت لێکۆڵینەوە لە هەموویان بکرێت بۆ ئەوەی بزانرێت کام حکومەت گەندەڵترین بووە."

محەمەد خالیدی پێشنیازی کرد کە پرۆسەی لێکۆڵینەوە لە حکومەتەکانی ساڵی ٢٠٠٥ـەوە دەست پێ بکات و هەموو دۆسییەکان بکرێنەوە. هاوکات داوای کرد لێکۆڵینەوە لە بڕوانامەی ئەکادیمیی هەموو ئەندامانی پەرلەمان بکرێت، نەک تەنیا ئەوانەی لە خولی ئێستادان، بەڵکو ئەوانەی خولەکانی پێشووش، لەگەڵ پشکنینی بڕوانامەی سەرەتایی، ناوەندی و زانکۆیی بۆ سەرجەم ئەو بەرپرسانەی لە دوای ساڵی ٢٠٠٣وە پلەی بەڕێوەبەری گشتی بەرەوژووریان هەبووە.