هەرێم نیوز
دۆناڵد ترەمپ، سەرۆکی ئەمریکا لە کۆتایی هەفتەی ڕابردوودا تاوتوێی بژاردەی هێرشکردنە سەر حووسییەکانی لە یەمەن کردووە، بەڵام لە کۆتاییدا بڕیاری داوە ئەو هەنگاوە دوابخات و لە داواکارییەکی سعوودیە بۆ بەکارهێنانی هێزی سەربازی پاشگەز ببێتەوە.
بەپێی زانیارییەکانی دوو بەرپرسی ئەمریکی بۆ ماڵپەڕی ئەکسیۆس ، ترەمپ لە نێوان یارمەتیدانی محەممەد بن سەلمان، شازادەی جێنشینی سعوودیە و دوورکەوتنەوە لە تێوەگلان لە بەرەیەکی نوێی شەڕ لە ڕۆژهەڵاتی ناوەڕاستدا گیری خواردبوو.
دە ڕۆژ لەمەوبەر، بن سەلمان لە یەک ڕۆژدا دوو جار پەیوەندی بە ترەمپەوە کردووە و داوای لێکردووە هێرش بکاتە سەر حووسییەکان، بەتایبەتی لە کاتێکدا کە هێزەکانی ئەو گرووپە نزیک دەبوونەوە لە خاڵێکی ستراتیژیی دەریای سوور.
سەرەڕای داواکارییەکەی سعوودیە، ترەمپ داواکارییەکەی ڕەتکردەوە و تەنیا ڕەزامەندیی دەربڕی لەسەر پێدانی زانیاریی هەواڵگری و دیاریکردنی ئامانجەکان بە سعوودیە.
بەرپرسانی ئەمریکا ڕایانگەیاندبوو تا ئەو کاتەی حووسییەکان هاتوچۆی کەشتییە ناسعوودییەکان لە دەریای سووردا پەک نەخەن، ئەمریکا هێرشی سەربازی ناکات.
دواتریش دیپلۆماتکارانی ئەمریکا لەگەڵ بەرپرسانی حووسییەکان کۆبوونەوە و دڵنیاییان وەرگرت کە نیازی داخستنی گەرووی بابولمەندەبیان نییە.
لەگەڵ ئەوەشدا، لە کۆتایی هەفتەی ڕابردوودا سعوودیە کە لە ڕووبەڕووبوونەوەی پێشڕەوییەکانی حووسییەکاندا تووشی کێشە ببوو، دووبارە داوای لە ترەمپ کرد هێرشی سەربازی بکات.
ئەدمیراڵ براد کوپەر، فەرماندەی فەرماندەیی ناوەندیی ئەمریکا (سێنتکۆم)، چەند بژاردەیەکی بۆ لێدانی حووسییەکان ئامادە کرد و رۆژی شەممە خستییە بەردەم هێگسێس، وەزیری بەرگری، بەڵام ترەمپ بڕیاری دا پرۆسەکە رابگرێت.
لەم بارەیەوە ئەلێکس پلیتساس، لێکۆڵەر لە ئەنجوومەنی ئەتڵەسی و بەرپرسی پێشووی پێنتاگۆن، ڕایگەیاند: "سەرۆک بڕیارەکەی گۆڕی، چونکە نەیدەویست بە هێرشکردن دەرگایەکی مەترسیدار بکاتەوە، کە ڕەنگە حووسییەکان ناچار بکات مەترسی لەسەر گەرووی بابولمەندەب دروست بکەن و نرخی نەوت بەرز ببێتەوە، لە کاتێکدا پێویستە سعوودیە خۆی سەرکردایەتیی ڕووبەڕووبوونەوەی کێشەی حووسییەکان بکات."
ئەم پێشهاتانە لە کاتێکدان کە هێزەکانی سعوودیە و یەمەن ماوەی دوو هەفتەیە پلانیان بۆ هێرشێکی پێچەوانە دژی حووسییەکان داناوە، بەڵام چەندین جار پرۆسەکە دواخراوە.
لە بەرامبەریشدا حووسییەکان هێرشەکانیان بۆ سەر سعوودیە چڕتر کردووەتەوە و لە کۆتایی هەفتەشدا مووشەکێکیان ئاراستەی شاری ڕیاز کردووە.