هەرێم نیوز
وتەبێژی فەرمیی هێزە چەکدارەکانی ئوردن، ئەمڕۆ چوارشەممە ٩ی ئەیلوولی ٢٠٢٦، ڕایگەیاند سیستەمەکانی بەرگریی ئاسمانیی سوپای وڵاتەکەی ڕووبەڕووی ٢٠ مووشەکی بالیستی بوونەتەوە کە لەلایەن ئێرانەوە بەرەو خاکی ئوردن تەقێندراون.
بەرپەرچدانەوەی مووشەکەکانی ئێران لە ئوردن
وتەبێژی هێزە چەکدارەکانی ئوردن لە ڕاگەیەندراوێکدا ئاماژەی بەوە کرد، ۱٨ مووشەکیان بە سەرکەوتوویی تێکشکێندراون و تێکدراون، و دوو مووشەکیش لە ناوچەی چۆڵ و دوور لە کۆبوونەوەی دانیشتووان کەوتوونەتە خوارەوە. جەختیشی کردەوە کە هیچ زیانێکی گیانی بەهۆی هێرشەکەوە تۆمار نەکراوە.
پەیامی سوپای پاسداران و هێرش بۆ سەر بنکەی ئەزرەق
ئەمە هاوکتە لەگەڵ ئەوەی سوپای پاسدارانی ئێران، بەرەبەیانی ئەمڕۆ چوارشەممە ڕایگەیاندبوو کە بنکەی ئاسمانیی "ئەزرەق"ی لە ئوردن بە مووشەکی بالیستیی قورس کردووەتە ئامانج، وەک وەڵامێک بۆ کردنە ئامانجی کەشتییە نەوتهەڵگرەکانی ئێران لەلایەن ئەمریکاوە؛ هەروەها بەڵێنی دا کە بەردەوام دەبێت لە ئۆپراسیۆنە سەربازییەکانی لەگەڵ بەردەوامبوونی هێرشەکانی ئەمریکادا.
کردنە ئامانجی کەشتییە جەنگی و نەوتهەڵگرەکان لەلایەن سێنتکۆم و ئێرانەوە
لای خۆیەوە، فەرماندەیی ناوەندیی ئەمریکا (سێنتکۆم) تێکشکاندنی ٥ کەشتیی نەوتهەڵگری نەوتی خاوی ئێرانی ڕاگەیاند، دوای ئەوەی سوپای پاسداران بە مووشەکی بالیستی کەشتییەکی جەنگیی سەر بە هێزی دەریایی ئەمریکای کردبووە ئامانج.