هەرێم نیوز

بەپێی ئەو زانیارییانەی تۆڕی هەواڵی CNN لە چەند سەرچاوەیەکەوە بڵاوی کردووەتەوە، ژمارەیەک لە دەزگاکانی سوپای ئەمریکا و هەواڵگریی ئەو وڵاتە خەریکی تاوتوێکردنی کەمکردنەوەی ژمارەی هێز و بنکە سەربازییەکانیانن لە ڕۆژهەڵاتی ناوەڕاست، ئەگەر ئیدارەی ترەمپ بتوانێت کۆتایی بە جەنگی دژی ئێران بهێنێت.

ئامادەکاری بۆ سیاسەتی نوێی ئیدارەی ترەمپ
سەرچاوەکان ڕوونیان کردەوە، گفتوگۆکان هێشتا نافەرمین و هیچ فەرمانێکی ڕاستەوخۆ بۆ پێداچوونەوەی گشتگیر بە بڵاوەپێکردنی هێزەکان دەرنەکراوە، لەگەڵ ئەوەشدا، ئەم دۆخە ئامادەییی بەرپرسانی سەربازی و هەواڵگری پیشان دەدات بۆ ئەو ئەگەرەی ئیدارەی ترەمپ سیاسەتی کەمکردنەوەی بوونی ئەمریکا لە ناوچەکەدا پەیڕەو بکات.

ئەمریکا لە ڕۆژهەڵاتی ناوەڕاستدا نزیکەی ٥٠ هەزار سەربازی هەیە، لەپاڵ بوونی کەرەستەی سەربازیی زۆر کە دوو کەشتیی فڕۆکەهەڵگری گەورە و زیاتر لە ١٢ کەشتیی جەنگیی مووشەکهاوێژ لەخۆدەگرێت، هاوکات ئەفسەرانی دەزگای هەواڵگریی ناوەندیی ئەمریکا (CIA)یش بەهۆی جەنگی ئێرانەوە لە ناوچەکەدا جێگیر بوون.

لاوازیی بنکەکان، گواستنەوە بۆ ژێر زەوی و زیانەکانی ڕیاز
تۆڕی CNN ئاماژەی بەوەش کردووە، سوپای ئەمریکا لە هەمان کاتدا لێکۆڵینەوە لە بەهێزکردنی پاراستنی ئەو بنکە و هێزانە دەکات کە لە ناوچەکەدا دەمێننەوە. هەروەها هەندێک لە دامەزراوەکانیش دەگوازێتەوە ژێر زەوی، وەک خۆپارێزییەک لە هێرشی مووشەکی و فڕۆکەی بێفڕۆکەوان.

سەرچاوەکان ڕوونیان کردەوە، جەنگەکە لاوازیی ژمارەیەک لە دامەزراوە ئەمریکییەکانی لە ڕۆژهەڵاتی ناوەڕاستدا دەرخست، دوای ئەوەی بنکەکانی ئەمریکا لە بەحرەین، قەتەر، سعودیە و کوەیت ڕووبەڕووی هێرشی ئێرانی بوونەوە. بەگوێرەی وتەی بەرپرسێکی ئەمریکی و ئەفسەرێکی پێشووی هەواڵگری، بنکەیەکی CIA لە ڕیاز بەهۆی هێرشێکی ئێرانییەوە بەتەواوەتی تێکچووە.

بەرپرسان تاوتوێی ئەوەش دەکەن کە هەندێک لەو کەرەستانەی تێکچوون یان زیانی زۆریان بەرکەوتووە، نۆژەن نەکرێنەوە بەهۆی تێچووی زۆری چاککردنەوە و بونیادنانەوەیان، هەروەها بیر لەوە دەکرێتەوە ژمارەیەک کارمەند و کەرەستە لەناو ئەمریکادا بمێننەوە و تەنیا بۆ جێبەجێکردنی ئەرکی دیاریکراو بنێردرێن بۆ ناوچەکە، نەک بەشێوەی هەمیشەیی تێیدا بن.

پاشەکشە لە کەنداو و هێزە دەریاییەکان
سەرچاوەکان بڵاویان کردەوە، بەرپرسانی باڵای پێنتاگۆن دەیانەوێت سەربازەکانیان لە ژمارەیەک وڵاتی کەنداو کەم بکەنەوە، لە چوارچێوەی هەوڵێکی بەرفراوانتردا تاوەکو هاوبەشە هەرێمییەکان ئەرکی بەرگریی زیاتر لە ئەستۆ بگرن، لە هەمان کاتدا جەختیان لەوە کردەوە کە هیچ خشتەیەکی کاتیی ڕوون بۆ کۆتاییهێنان بە جەنگەکە یان گەیشتن بە ڕێککەوتن لەگەڵ تاران بوونی نییە.

هەروەها دارێل کۆدڵ، سەرۆکی ئۆپەراسیۆنە دەریاییەکانی ئەمریکا هەفتەی ڕابردوو ڕایگەیاند، هێزەکانیان لە داهاتوویەکی نزیکدا ناگەڕێنەوە بۆ بەحرەین، کە بنکەی سەرەکیی کەشتیگەلی پێنجەمی فڕۆکەهەڵگری ئەمریکایە.