هەرێم نیوز

بنیامین نەتەنیاهۆ، سەرۆکوەزیرانی ئیسرائیل ئەمڕۆ یەکشەممە، 5ـی 7ـی 2026، ڕایگەیاند، ئاوەدانکردنەوەی کەرتی غەززە بەبێ هەڵوەشاندنەوەی ژێرخانی سەربازی و چەکداماڵینی کەرتی غەززە ئەنجام نادرێت.

ناوبراو ئاماژەی بەوەش کرد کە دانیشتوانی کەرتی غەززە ئازادن لە هەڵبژاردنی مانەوە یان ڕۆیشتن، بەبێ ئەوەی مەترسییەک ڕووبەڕوویان ببێتەوە.

نەتەنیاهۆ لە لێدوانەکەیدا جەختی لەوە کردەوە کە ئەو "هەڕەشەیەی لە غەززەوە دەهات" لە ڕێگەی دامەزراندنی "دەوری نوێی غەززە" لەناو کەرتی غەززە لابراوە. ناوبراو هەروەها ئاماژەی بەوە کرد کە لابردنی مەترسییەکان لە غەززە بووەتە هۆی زیادبوونی خواست لەسەر خانوبەرە لەو ناوچانەدا.

سەبارەت بە دۆخی لوبنان، نەتەنیاهۆ وتی: "ئێمە شەرعیەتمان بەدەستهێناوە بۆ ئەوەی بەدرێژایی هێڵی زەرد لە باشووری لوبنان بمێنینەوە و ترەمپیش داوای لێ نەکردین دژ بە تونێلەکانی حزبوڵا مامەڵە نەکەین". نەتەنیاهۆ حزبوڵای بەوە تۆمەتبار کرد کە ڕێککەوتنی ئیسرائیل لەگەڵ ئێران "تێک دەدات" و هێرش دەکاتە سەر ڕێککەوتنەکەیان.

شایانی باسە، ئەم لێدوانانە لە کاتێکدایە کە گفتوگۆ نێودەوڵەتییەکان سەبارەت بە داهاتووی کەرتی غەززە بەردەوامە. بەپێی سیاسەتە ڕاگەیەندراوەکانی نەتەنیاهۆ، ئیسرائیل پێداگری لەسەر کۆنتڕۆڵی ئەمنی، لەناوبردنی توانای سەربازی حەماس و بەستنەوەی هەر پرۆسەیەکی ئاوەدانکردنەوە بە چەکداماڵینی گروپە چەکدارەکان دەکات.