هەرێم نیوز
کۆماری ئیسلامیی ئێران بە فەرمی وەڵامدانەوەی سەربازیی هێرشەکانی ئەمریکای ڕاگەیاند و ئاشکرای کرد کە چەندین پێگە و بنکەی هێزەکانی سوپای ئەمریکای لە ناوچەی کەنداو بە چڕی کردووەتە ئامانج.
بۆردومانکردنی پێگە سەربازییەکانی ئەمریکا لە کەنداو
دوای چەند کاتژمێرێک لە هێرشە ئاسمانییەکانی فەرماندەیی ناوەندیی هێزەکانی ئەمریکا (سێنتکۆم) بۆ سەر بنکەکانی ڕادار و موشەکیی ئێران، سوپای پاسدارانی ئێران بەیاننامەیەکی فەرمیی بڵاوکردەوە. لە ڕاگەیەندراوەکەدا هاتووە کە هێزە دەریاییەکانی سوپای پاسداران، وەک وەڵامێکی ڕاستەوخۆ و خێرا بۆ هێرشەکانی ئەمریکا، چەندین پێگە و بنکەی سەربازیی ئەو وڵاتەیان لە ناوچەی ستراتیژیی کەنداو بۆردومان کردووە.
هۆشداریی توند؛ کۆنترۆڵی هورمز لای ئێرانە
سوپای پاسداران لە بەیاننامەکەیدا هۆشداریی توندی ئاراستەی واشنتن کرد و ڕایگەیاند: "ئەگەر دەستدرێژی و هێرشەکانی ئەمریکا بۆ سەر خاکی ئێران دووبارە ببنەوە، بێگومان وەڵامی داهاتوومان زۆر توندتر، بەرفراوانتر و بێبەزەییانەتر دەبێت."
هاوکات، لایەنی ئێرانی پێداگریی لەسەر پاراستنی پێگەی خۆی لە ناوچە ئاوییەکاندا کردەوە و جەختی کردەوە کە بەگوێرەی ڕێککەوتنی ئاگربەستی نێوان هەردوولا، مافی کۆنترۆڵکردنی تەواوەتیی هاتوچۆی دەریایی و بازرگانی لە گەرووی هورمزدا بە تەواوی لە دەستی هێزەکانی کۆماری ئیسلامیی ئێراندایە و ڕێگە بە هیچ هێزێکی دەرەکی نادەن ئەو هاوکێشەیە بگۆڕێت