هەرێم نیوز

دۆناڵد ترەمپ، سەرۆکی ویلایەتە یەکگرتووەکانی ئەمریکا، لە لێدوانێکی نوێ و تونددا پەردەی لەسەر ستراتیژیەتی وڵاتەکەی بەرامبەر بە دۆسیەی ناوچەیی و ئەتۆمیی کۆماری ئیسلامیی ئێران لادا و ڕایگەیاند کە واشنتن گەورەترین ڕێککەوتنی مێژوویی لە بەرژەوەندیی خۆی و هاوپەیمانەکانی مۆر کردووە.

ڕێککەوتنێکی مێژوویی لەگەڵ تاران و پاراستنی ئیسرائیل
دۆناڵد ترەمپ بە فەرمی جەختی لەسەر هێڵە سوورەکانی واشنتن کردەوە و ڕایگەیاند: "ئێمە بە هیچ جۆرێک ڕێگە نادەین و نادەین ئێران ببێتە خاوەنی چەکی ئەتۆمی."
سەرۆکی ئەمریکا ئاشکرای کرد کە وڵاتەکەی سەرکەوتوو بووە لە ناچارکردنی تاران بۆ ئیمزاکردنی ڕێککەوتنێکی نوێ و وتی: "توانیومانە بگەینە ڕێککەوتنێک لەگەڵ ئێران کە بە باشترین و بەهێزترین ڕێککەوتن لە مێژووی تەواوی ئیدارەکانی ئەمریکادا ئەژمار دەکرێت، چونکە لایەنی ئێرانی بۆ گەیشتن بەم ئەنجامە، ناچار بوو سازش و نەرمی نواندنی یەکجار زۆر پێشکەش بە ئێمە بکات."

ترەمپ لە درێژەی قسەکانیدا تیشکی خستە سەر پاراستنی هاوپەیمانە ستراتیژییەکەیان لە ڕۆژهەڵاتی ناوەڕاست و بە ڕاشکاوی ڕایگەیاند: "ئەگەر ئێمە بە توندی بەرنامەی ئەتۆمیی ئێرانمان لەناو نەبردایە، ئێستا دەوڵەتی ئیسرائیل لەسەر نەخشەی جیهان بوونی نەمابوو."

کوشتنی قاسم سولەیمانی و کاریگەرییەکانی لە تاران
سەرۆکی ئەمریکا گەڕایەوە سەر دۆسیەی کوشتنی فەرماندەی پێشووی فەیلەقی قودسی سوپای پاسداران و جەختی کردەوە کە ئۆپراسیۆنی لێدانی قاسم سولەیمانی، یەکێک بووە لە گەورەترین و کاریگەرترین ئەو ڕووداوە سەربازییانەی کە ناوچەی ڕۆژهەڵاتی ناوەڕاست لە مێژووی هاوچەرخی خۆیدا شاهیدی بووە.

ترەمپ لە لێکدانەوەیەکی کتوپڕدا دەربارەی ناوخۆی ئێران وتی: "من تەنانەت باوەڕم وایە عەلی خامنەیی و سەرکردەکانی تریش لە ناو ئێراندا، لە ناخەوە بە کوشتنی سولەیمانی دڵخۆش بوون؛ چونکە ئەوانیش خۆیان لە قەبارەی دەسەڵات و هەژموونی ئەو فەرماندەیە دەترسان."

گرژییەکانی گەرووی هورمز و هێرشە درۆنییەکان
لە ڕووی مەیدانییەوە، دۆناڵد ترەمپ پێشهاتە ئەمنییەکانی دەریای پشتڕاستکردەوە و ڕایگەیاند کە هێزەکانی ئێران دووبارە ڕێڕەوە ئاوییە نێودەوڵەتییەکانیان شێواندووە و کەشتییەکی تریان لە ناوچەی ستراتیژیی گەرووی هورمزدا کردووەتە ئامانج. سەرۆکی ئەمریکا ڕوونی کردەوە کە ئەو کەشتییە بەهۆی هێرشی ڕاستەوخۆی فڕۆکەیەکی بێفڕۆکەوانی (درۆن) ئێرانییەوە پێكراوە و بەهۆیەوە زیانی پێگەیشتووە، ئەمەش هاوکاتی ئەو گرژییە سەربازییانەیە کە لە چەند ڕۆژی ڕابردوودا لەو ناوچەیەدا ڕوویان داوە.