هەرێم نیوز
دۆناڵد ترەمپ، سەرۆکی ویلایەتە یەکگرتووەکانی ئەمریکا، ڕایدەگەیەنێت، کە دانوستانەکان لەگەڵ ئێران بە باشی بەڕێوەدەچن، بەڵام هاوکات مەرجێکی نوێی خستووەتە ڕوو کە دەبێت وڵاتانی ڕۆژهەڵاتی ناوەڕاست هاوشانی ئەم ڕێککەوتنە، بچنە ناو ڕێککەوتننامەی مێژوویی "ئیبراهیم"ـەوە.
ئەمڕۆ دووشەممە، 25ـی 5ـی 2026، دۆناڵد ترەمپ، سەرۆکی ویلایەتە یەکگرتووەکانی ئەمریکا، لە تۆڕی کۆمەڵایەتیی "ترو سۆشاڵ" بەیاننامەیەکی بڵاوکردەوە و ئاماژەی بەوەش کردووە، کە دانوستانەکان لەگەڵ کۆماری ئیسلامیی ئێران بە باشی بەڕێوەدەچن، بەڵام یان دەبێت ڕێککەوتنێکی گەورە بۆ هەمووان بێت یان هیچ ڕێککەوتنێک نابێت و دۆخەکە بەرەو بەرەکانی جەنگ دەگەڕێتەوە، کە کەس ئەوەی ناوێت.
ترەمپ ئاشکرای کردووە، کە لە میانی گفتوگۆکانیدا لەگەڵ محەمەد بن سەلمان شازادەی جێنشینی سعوودیە، محەمەد بن زاید سەرۆکی ئیمارات، تەمیم بن حەمەد ئەمیری قەتەر، محەمەد بن عەبدولڕەحمان سەرۆکوەزیرانی قەتەر، عەلی سەوادی وەزیری قەتەری، عاسم مونیر فەرماندەی سوپای پاکستان، ڕەجەب تەیب ئەردۆغان سەرۆکی تورکیا، عەبدولفەتاح سیسی سەرۆکی میسر، عەبدوڵای دووەم پادشای ئوردن و حەمەد بن عیسا پادشای بەحرێن، پێی ڕاگەیاندوون کە پێویستە وەک مەرجێکی سەرەکی، سەرجەم ئەم وڵاتانە بە هاوڕەگەزی واژۆ لەسەر ڕێککەوتنەکانی ئیبراهیم بکەن.
سەرۆکی ئەمریکا باسی لەوەش کردووە، کە پێویستە ئەم پڕۆسەیە بە واژۆکردنی دەستبەجێی سعوودیە و قەتەر دەست پێ بکات و وڵاتانی دیکەش شوێنیان بکەون، چونکە ڕەتکردنەوەی ئەم هەنگاوە نیشانەی بوونی نیەتی خراپە. زانیاریی زیاتریشی خستووەتە ڕوو، کە لە کاتی جێبەجێبوونی ئەم پڕۆژەیەدا، ئامادەیی هەیە کە ئێران خۆی ببێتە بەشێک لەم هاوپەیمانێتییە و هاوپەیمانێتیی ئیبراهیم وەک گەشەیەکی دارایی و ئابووریی گەورە بۆ ناوچەکە وەسف دەکات.
ترەمپ دەڵێت، کە نوێنەرانی خۆی ئاگادار کردووەتەوە پڕۆسەی واژۆکردنی ئەم وڵاتانە لە ڕێککەوتنی ئیبراهیم دەست پێ بکەن، تاوەکو ڕۆژهەڵاتی ناوەڕاست ببێتە ناوچەیەکی یەکگرتوو و بەهێز لە ڕووی ئابووری و سەربازییەوە.