هەرێم نیوز

ئیسرائیل کاتز، وەزیری بەرگریی ئیسرائیل، بە فەرمی کوژرانی ئیسماعیل خەتیب، وەزیری ئیتلاعاتی ئێرانی ڕاگەیاند و ئاشکرای کرد کە سوپای وڵاتەکەی دەسەڵاتی ڕەها و بێگەرانەوەی پێدراوە بۆ تیرۆرکردنی هەر بەرپرسێکی باڵای تاران.

وەزیری بەرگریی ئیسرائیل، ئەمڕۆ چوارشەممە ١٨ی ئاداری ٢٠٢٦، ڕایگەیاند کە ئیسماعیل خەتیب لە هێرشێکی وردی شەوانەدا "لەناو براوە". ئەم هەواڵە دوای ئەوە دێت کە:
• کەناڵی ١٢ی ئیسرائیلی: بەیانی ئەمڕۆ ئاماژەی بەوە کردبوو کە سوپا چاوەڕێی پشتڕاستکردنەوەی ئەنجامی هێرشەکە دەکات بۆ سەر وەزیری هەواڵگری.
• خەڵاتی ١٠ ملیۆن دۆلاری: خەتیب یەکێک بوو لەو بەرپرسانەی کە ئەمریکا لە هەفتەی ڕابردووەوە خەڵاتی ١٠ ملیۆن دۆلاری بۆ هەر زانیارییەک لەسەری تەرخان کردبوو.

کاتز گۆڕانکارییەکی گەورەی لە ستراتیژیی سەربازیی وڵاتەکەی ڕاگەیاند و وتی:
"من و بنیامین ناتانیاهۆ، دەسەڵاتی تەواومان داوە بە سوپا بۆ کوشتنی هەر بەرپرسێکی تری باڵای ئێران کە بکرێتە ئامانج، بێ ئەوەی پێویست بە وەرگرتنی ڕەزامەندیی زیاتر بکات."

کوژرانی وەزیری ئیتلاعات لە کاتێکدایە کە تاران هێشتا لەژێر شۆکی کوژرانی دوو سەرکردەی تری باڵادایە:

1. عەلی لاریجانی: بەرپرسی باڵای ئاسایشی نیشتمانی.
2. غوڵامڕەزا سولەیمانی: سەرۆکی هێزی بەسیجی سەر بە سوپای پاسداران.

ئیسماعیل خەتیب کێ بوو؟
خەتیب کە لە ساڵی ٢٠٢١ـەوە لە پۆستی وەزیری ئیتلاعاتدایە، وەک پیاوێکی ئایینی توندڕەو و یەکێک لە کەسە هەرە نزیکەکانی عەلی خامنەیی و سوپای پاسداران دەناسرێت. ئەو بەرپرسی یەکەمی هەواڵگریی وڵات بوو و بە هەماهەنگیی ڕاستەوخۆی ڕێبەری باڵا دەستنیشان کرابوو.