هەرێم نیوز 

دەیڤید کیس، وتەبێژی پێشووی بنیامین نەتانیاهۆ سەرۆک وەزیرانی ئیسرائیل، چەند ڕۆژێک لەمەوبەر دەنگدانەوەیەکی زۆری نایەوە کاتێک لە هەژماری خۆی لە پلاتفۆرمی "X" بڵاوکراوەیەکی بڵاوکردەوە و تێیدا ئاماژەی بەوە کرد کە کەسایەتییەکی دیاری ئێرانی دەبێتە "ئامانجی داهاتوو" بۆ ئیسرائیل، کە مەبەستی عەلی لاریجانی، سکرتێری ئەنجومەنی باڵای ئاسایشی نەتەوەیی ئێران بوو.
لە دەقی تویتەکەدا هاتبوو: "لاریجانی کەسی داهاتووە. چۆن دەزانم؟ چونکە ئەو پیاوەی بازنەی سووری لەسەر کێشراوە، هابا باتۆر، یەکێکە لە باشترین بریکارەکانمان و هاوڕێی نزیکی منیشە. هابا بەیانی ئەمڕۆ لە ئێران گەڕایەوە، و لەگەڵ کوژرانی موجتەبا، لاریجانی هەفتەیەکی پڕ لە ڕووداوی دەبێت."
لەگەڵ ڕاگەیاندنی کوژرانی لاریجانی، چالاکوانان جارێکی تر تویتەکەیان بە شێوەیەکی بەرفراوان بڵاوکردەوە. وەزیری بەرگری ئیسرائیل، ئیسرائیل کاتس، ڕۆژی سێشەممە کوژرانی عەلی لاریجانی، سکرتێری ئەنجومەنی باڵای ئاسایشی نەتەوەیی ئێرانی ڕاگەیاند. لاریجانی لە ڕیزی ئەو بەرپرسانەدا بوو کە ئەمریکا پێش چەند ڕۆژێک خەڵاتی بۆ هەر کەسێک دیاری کردبوو کە زانیاری لەسەر بدات.
عەلی لاریجانی کێیە؟ (داڕێژەری پڕوپاگەندەی ئێران و بەڕێوەبەری دۆسیەی ئەتۆمی)
لەگەڵ ڕاگەیاندنی کوژرانی لەلایەن وەزیری بەرگری ئیسرائیلەوە لە ئەنجامی هێرشە ئاسمانییەکانی شەوی ڕابردوو، ئاوڕێک لە ژیانی ئەم کەسایەتییە سیاسییە کاریگەرەی ئێران دەدەینەوە:
• پێگە و پۆستەکان: لاریجانی یەکێک بوو لەو دەموچاوە دیارانەی کە بۆ چەندین دەیە لە نێوان دەزگا ئەمنییەکان، بازنە سیاسییەکان و ناوەندەکانی بڕیاردان کە ڕاستەوخۆ بە ڕێبەری باڵاوە بەستراونەتەوە، هاتوچۆی دەکرد. دوو جار پۆستی سکرتێری ئەنجومەنی باڵای ئاسایشی نەتەوەیی وەرگرتووە (٢٠٠٥-٢٠٠٧ و ٢٠٢٥ تا ئێستا)، هەروەها بۆ ماوەی ١٢ ساڵ (٢٠٠٨-٢٠٢٠) سەرۆکی پەرلەمانی ئێران بووە.
• دەستپێکی کارکردن: لاریجانی کە لە شاری نەجەف لە عێراق لەدایکبووە، دوای شۆڕشی ئێران لە ڕێگەی دەزگا ئەمنی و سەربازییەکانەوە دەستی پێکرد و پەیوەندی بە سوپای پاسدارانەوە کرد.
• پڕوپاگەندە و ڕاگەیاندن: بۆ ماوەیەک بەڕێوەبەری دەستەی ڕادیۆ و تەلەفزیۆنی فەرمی ئێران بوو، لەوێدا "پڕوپاگەندە"ی ئێرانی داڕشت و سیستمێکی ڕاگەیاندنی دروستکرد کە تەواو وەفادار بێت بۆ سوپای پاسداران و ڕێبەری باڵا.
• دۆسیەی ئەتۆمی: لە ساڵی ٢٠٠٥ بوو بە گەورە دانوستانکاری ئەتۆمی ئێران لەگەڵ هێزە ڕۆژئاواییەکان، بەڵام لە ساڵی ٢٠٠٧ بەهۆی ناکۆکی لەگەڵ ئەحمەدی نەژاد دەستی لەکار کێشایەوە.
• گەڕانەوە و سزاکان: لە ئابی ٢٠٢٥ لەلایەن مەسعوود پزیشکیانەوە دووبارە کرایەوە بە سکرتێری ئەنجومەنی باڵای ئاسایشی نەتەوەیی. لە کانوونی دووەمی ٢٠٢٦، وەزارەتی گەنجینەی ئەمریکا سزای بەسەردا سەپاند بە تۆمەتی هەماهەنگی لە سەرکوتکردنی خۆپێشاندانەکان.
شارەزایان پێیان وایە کوژرانی لاریجانی گورزێکی گەورەیە بۆ ڕژێمی ئێران، چونکە ئەو کەسایەتییەکی میحوەر بوو لە داڕشتنی سیاستە ئەمنی و دانوستانکارییەکانی تاراندا.