هەرێم نیوز
دەزگای ئاسایشی هەرێم لە سێ چالاکی جیاوازدا سێ تۆمەتباری ماددەی هۆشبەریان دەستگیرکرد، لەگەڵ دەستبەسەردا گرتنی 24 کیلۆگرام ماددەی هۆشبەر لەجۆری کریستاڵ و 11 کیلۆگرام حەشیش.
ئاسایشی هەرێم دەڵێت، لە هەوڵەکانی بەردەوامە بۆ ڕێگریکردن لەبڵاوبوونەوەی ماددە هۆشبەرەکان و دەستگیرکردنی بازرگانانی ماددەی هۆشبەر.
دەشڵێت: بەڕێوەبەرایەتی گشتی نەهێشتنی ماددە هۆشبەرەکان، لە مانگی یەکی ساڵی 2026دا، لە سێ چالاکی جیاوازدا سێ تۆمەتبار دەستگیردەکەن کە بازرگانی نێوخۆیی و بیانی بوون، هەروەها توانراوە دەستبگیرێت بەسەر بڕی 24 کیلۆگرام ماددەی هۆشبەر لەجۆری کریستاڵ و ١١ کیلۆگرام حەشیش.
تۆمەتباران هەوڵیانداوە لە رێگەی (پۆست)ەوە ئەو ماددە هۆشبەرانە بەرەو ووڵاتانی ئەوروپا بنێرن.
لەئێستادا تۆمەتباران بەماددەی 25 لەیاسای ماددە هۆشبەرەکان و کارتێکەرە ئەقڵییەکان ڕاگیراون و لێکۆڵینەوە لە دۆسییەکانیان بەردەوامە.