هەرێم نیوز
مەسرور بارزانی، سەرۆکوەزیرانی هەرێمی کوردستان لە چاوپێکەوتنێکی تایبەتدا لەگەڵ کەناڵی "سکای نیوز عەرەبیە"، پەیامێکی ستراتیژی و ڕاشکاوی سەبارەت بە داهاتووی کورد و پەیوەندییەکانی تاران، ئەنقەرە و بەغدا ڕاگەیاند.
سەرۆکوەزیرانی هەرێمی کوردستان جەختی کردەوە کە کورد وەک عەرەب، تورک و فارس مافی یەکسانی هەیە و نابێت ڕێگری لە خەونەکانیان بکرێت. ئەو وتی: "ناسنامەی کوردی شانازییەکی گەورەیە؛ تەنیا ئەو کەسانەی ڕێز لە فرەیی ناگرن، کورد وەک کێشە دەبینن."
مەسرور بارزانی ئاماژەی بە واقیعی سیاسی جیاوازی هەر بەشێک کرد:
• سووریا: پشتیوانی لە بەدەستهێنانی مافەکانی کورد کرد و وتی "شایەنی ناساندنن".
• تورکیا: هیوای خواست پرۆسەی ئاشتی ببێتە هەوێنی چارەسەرێکی بەردەوام.
• ئێران: جەختی کردەوە کە پێویستە کورد بگاتە ئەو مافانەی شایستەیەتی.
سەرۆکوەزیران بە توندی ڕەخنەی لە بەکارهێنانی بودجە وەک "کارتێکی سیاسی" گرت و داوای کرد:
١. سیستەمی فیدراڵی وەک خۆی لە عێراق جێبەجێ بکرێت.
٢. پۆستی سەرۆککۆمار بەپێی ئیستحقاقی هەڵبژاردن و "ئیرادەی زۆرینەی گەلی کورد" بێت بۆ نوێنەرایەتییەکی ڕاستەقینە.
مەترسییەکانی داعش و مانەوەی هاوپەیمانان
مەسرور بارزانی هۆشداری دا کە داعش هێشتا مەترسییە، چونکە نادادی و هەژاری وەک ژینگەی گەشەی توندڕەوی ماونەتەوە. جەختیشی کردەوە کە مانەوەی هێزەکانی ئەمریکا و هاوپەیمانان بۆ سەقامگیری ناوچەکە "پێویستییەکی بەردەوامە".