هەرێم نیوز
پێشەوا هەورامانی، وتەبێژی حکومەتی هەرێمی کوردستان، وەڵامێکی توندی محەمەد حەلبوسی، سەرۆکی حزبی تەقەدومی دایەوە و ڕایگەیاند کە هەولێر نەک هەر چاوەڕێی ئەو نییە، بەڵکو پێشوازیشی لێ ناکات.
لە وەڵامی لێدوانێکی پێشتری حەلبوسی کە گوتبووی "سەردانی هەولێر ناکەم"، پێشەوا هەورامانی ڕایگەیاند: "هەولێر پێشوازی لە سەردانەکەتان ناکات، چونکە لێرە شوێنێک نییە بۆ کەسانێک چاکەیان لەبەرچاو نەبێت."
وتەبێژی حکومەت بە توندی هێرشی کردە سەر حەلبوسی و ڕایگەیاند کە ئەو نوێنەرایەتی ئایدۆلۆژیایەکی "شۆڤێنیستی" دەکات. هەورامانی ئاماژەی بەوەش کرد:
• دەبێت لێپرسینەوەی یاسایی لەگەڵ حەلبوسی بکرێت لەسەر ئەو ملیۆنەها دۆلارەی لە ڕێگەی گەندەڵییەوە بەدەستی هێناوە.
• حەلبوسی بە قۆستنەوەی "خوێن و ئارەقەی گەلی عێراق" سەرمایەی کۆکردووەتەوە.
• مانەوەی کەسانی وەک ئەو، نیشانەی ئەوەیە کە هێشتا بیری شۆڤێنی لە عێراقدا کۆتایی نەهاتووە.
هەورامانی جەختی کردەوە کە قەوارەی هەرێمی کوردستان بەرهەمی قوربانییەکی بێئەندازەیە و گوتی: "تۆ زۆر لەوە بێبایەختری سنوورێک بۆ ئیرادەی هەرێمی کوردستان دابنێیت، پێویستە پەند و وانە لە مێژوو وەربگریت."