هەرێم نیوز

ئەمڕۆ چوارشەممە، ١١ی شوباتی ٢٠٢٦، لوتکەی سیاسیی نێوان پارتی دیموکراتی کوردستان و یەکێتی نیشتمانیی کوردستان لە پیرمام دەستی پێکرد. ئەم کۆبوونەوەیە بە "چارەنووسساز" وەسف دەکرێت بۆ یەکلاکردنی دۆسیە هەڵپەسێردراوەکانی نێوان هەولێر و سلێمانی، بەتایبەت پۆستی سەرۆک کۆماری عێراق.

بەپێی زانیارییەکانی ئەشواق جاف، ئەندامی کۆمیتەی ناوەندیی پارتی، کۆبوونەوەکەی ئەمڕۆ خاڵی کۆتایی دەبێت بۆ دوو سیناریۆ:
1. ڕێککەوتن: هەردوولا بە یەک کاندیدی هاوبەش و پاکێجێکی یەکگرتوو بەرەو بەغدا بەڕێ دەکەون.
2. مانەوەی جیاوازییەکان: دووبارەبوونەوەی سیناریۆی ٢٠١٨ و ٢٠٢٢، کە تێیدا هەردوولا بە دوو کاندیدی جیاواز دەچنە ناو هۆڵی پەرلەمانی عێراق و ململانێکە بۆ دەنگی پەرلەمانتاران جێدەهێڵن.

هەرێم کەمال ئاغا، سەرۆکی فراکسیۆنی یەکێتی لە پەرلەمانی عێراق ئاماژەی بەوە داوە، کە چاوەکان لەسەر دەرەنجامی کۆبوونەوەکەی پیرمامن. ئەگەر "دوکەڵی سپی" لە پیرمامەوە بەرز بێتەوە و ڕێککەوتن بکرێت، ئەوا بڕیارە سبەینێ پێنجشەممە، ١٢ی شوبات، پەرلەمانی عێراق کۆبوونەوەی تایبەت بۆ هەڵبژاردنی سەرۆک کۆمار ئەنجام بدات.

جگە لە پرسی بەغدا، پرسی پێکهێنانی کابینەی نوێی حکومەتی هەرێمی کوردستان بەشێکی تری گفتوگۆکان دەبێت. پارتی وەک براوەی یەکەم و یەکێتی وەک لایەنێکی سەرەکی، هەوڵ دەدەن لەسەر دابەشکردنی پۆستەکان و کارنامەی حکومەت بگەنیە خاڵێکی هاوبەش تاوەکو پرۆسەی سیاسی لە هەرێم خێرا بکرێت.

چاوەڕوانییەکان لە کۆبوونەوەکەی ئەمڕۆ:

• کاندیدی نیشتمانی: گەیشتن بە ڕێککەوتن لەسەر کاندیدێکی یەکگرتوو بۆ پۆستی سەرۆک کۆمار.
• چارەسەری بەستەڵەک: شکاندنی بنبەستی سیاسیی نێوان هەردوو لایەن لەبارەی پۆستە سیادییەکانی هەرێم.
• هەماهەنگی لە بەغدا: داڕشتنی ستراتیژییەتێکی هاوبەش بۆ پاراستنی مافە دەستوورییەکانی هەرێمی کوردستان لە کابینەی داهاتووی عێراقدا.