هەرێم نیوز
پرۆسەی پێکهێنانی حکومەتی نوێی عێراق چووەتە قۆناغێکی چەقبەستوو، زانیارییە نوێیەکانیش ئاماژە بۆ ئەوە دەکەن کە کلیلی چارەسەر لە بەغدا نییە، بەڵکو پەیوەستە بە ئەنجامی ململانێکانی نێوان ئەمریکا و ئێران لە ناوچەکەدا.
سەرچاوە ئاگادارەکان لە ناو جەرگەی هێزە سیاسییەکانی بەغداوە باس لەوە دەکەن، کە ململانێی سەر پۆستی سەرۆککۆمار و دیاریکردنی سەرۆکوەزیران بەم نزیکانە یەکلایی نابێتەوە. پێشبینی دەکرێت ئەم "بنبەستە سیاسییە" چەند مانگێکی دیکە بخایەنێت و پرۆسەکە زیاتر لەوەی چاوەڕوان دەکرا درێژە بکێشێت.
بەپێی ڕاپۆرتێکی ڕۆژنامەی (شەرقولئەوسەت)، هێزە سیاسییە شیعەکان گەیشتوونەتە ئەو بڕوایەی کە پێکهێنانی حکومەت ڕاستەوخۆ پەیوەستە بە قەبارەی گرژییەکانی نێوان ئەمریکا و ئێران. هۆکاری دواکەوتنەکە بۆ ئەمانە دەگەڕێتەوە:
• گرژییە ناوچەییەکان: ئەگەری پێکدادانی سەربازی یان ڕێککەوتنی سیاسی نێوان تاران و واشنتۆن.
• گۆڕانکاری لە میکانیزم: چاوەڕێ دەکرێت دوای یەکلابوونەوەی ململانێی ئەم دوو وڵاتە، شێوازی پێکهێنانی حکومەت بە قازانجی یەکێک لە جەمسەرەکان بگۆڕێت.
لایەنە عێراقییەکان، بەتایبەت چوارچێوەی هەماهەنگی، درک بەوە دەکەن کە بێ گڵۆپی سەوزی نێودەوڵەتی و ناوچەیی، ناتوانن هەنگاوێکی یەکلاکەرەوە بنێن. ئەمەش وای کردووە هەوڵە ناوخۆییەکان تەنها وەک "کات کوشتن" بمێننەوە تا ئەو کاتەی هاوکێشە گەورەکە لە دەرەوە ڕوون دەبێتەوە.