هەرێم نیوز
شاخەوان عەبدوڵا، سەرۆکی فراکسیۆنی پارتی دیموکراتی کوردستان لە ئەنجومەنی نوێنەرانی عێراق، دوایین زانیارییەکانی لەسەر پرۆسەی هەڵبژاردنی سەرۆک کۆمار و هەوڵەکانی پارتەکەی بۆ بەدەستهێنانی ئەو پۆستە ئاشکرا کرد.
شاخەوان عەبدوڵا ڕایگەیاند کە پارتی دیموکراتی کوردستان کاندیدی فەرمیی خۆی بۆ پۆستی سەرۆک کۆمار هەیە و ڕۆژی سێشەممەی داهاتوو وەک وادەی کۆتایی بۆ هەڵبژاردنی سەرۆک کۆماری نوێی عێراق دیاریکراوە. وتیشی: "گفتوگۆکانمان لەگەڵ لایەنە سیاسییەکان بەردەوامە بۆ تەواوکردنی ئیستحقاقە دەستوورییەکان."
سەرۆکی فراکسیۆنی پارتی جەختی لەوە کردەوە کە ئامانجی ئەوان تەنها وەرگرتنی پۆستەکە نییە، بەڵکو دەیانەوێت لە ڕێگەی کاندیدەکەیانەوە ڕۆڵی ڕاستەقینە بۆ دامەزراوەی سەرۆکایەتی کۆمار بگەڕێننەوە، بە جۆرێک ببێتە پارێزەری ڕاستەقینەی دەستوور و هاوسەنگیی سیاسی لە عێراقدا.
بۆ تێپەڕاندنی چەقبەستوویی سیاسی، شاخەوان عەبدوڵا ئاشکرای کرد:
• کۆدەنگیی سیاسی: لیژنەیەکی تایبەتمەندی پارتی لە بەغدا لەگەڵ سەرکردایەتیی باڵای حزبەکە لە هەوڵی بەردەوامدان بۆ دروستکردنی کۆدەنگی لەگەڵ لایەنە شیعە و سوننەکان.
• تێپەڕاندنی قۆناغەکە: ئامانج لەم جووڵە دیپلۆماسییە، سەرخستنی کاندیدی پارتی و دەربازکردنی وڵاتە لەو بنبەستە سیاسییەی کە ماوەیەکە بەرۆکی عێراقی گرتووە.