هەرێم نیوز
ناوەندی ڕاگەیاندنی هێزەکانی سووریای دیموکرات (هەسەدە) ڕایگەیاند، کە بەرەبەیانی ئەمڕۆ سێشەممە (٢٠ی کانوونی دووەمی ٢٠٢٦)، زنجیرەیەک هێرشی توندی هێزەکانی حکومەتی سووریایان لە سێ قۆڵی جیاوازەوە بۆ سەر دەوروبەری کۆبانێ تێکشکاندووە و زیانی گەورەی گیانی و ماددییان لێ کەوتووەتەوە.
بەپێی ڕاگەیەندراوەکە، لە کاتژمێر ٠٣:٠٠ی بەرەبەیان تاوەکو ٠٦:٠٠ی بەیانی، شەڕێکی سەخت لە بەرەی سرین لە باشووری کۆبانێ ڕوویداوە. هەسەدە دەڵێت:
• تێکشاندنی زرێپۆشەکان: ژمارەیەکی زۆر لە ئۆتۆمبێلی سەربازی و زرێپۆشی سوپای سووریا تێکشکێندراون.
• زیانی گیانی: تەواوی سەرنشینانی ئەو ئۆتۆمبێلە سەربازییانەی کە کراونەتە ئامانج، کوژراون.
هاوکات لەگەڵ هێرشەکەی سرین، هێزەکانی حکومەتی سووریا لە دوو قۆڵی دیکەوە هەوڵی پێشڕەوییان داوە:
١. بەرەی ئەبو سوڕە: شەڕڤانان گورزێکی وردیان لە کاروانێکی سەربازیی سوپا داوە و ناچاریان کردوون بە پەلە "بکشێنەوە و هەڵبێن."
٢. بەرەی خان مامەد: لە باشووری ڕۆژهەڵاتی کۆبانێ، پلانێکی دیکەی پێشڕەوی شکستی هێناوە و هەسەدە دەڵێت: "دوژمن گورزی کەمەرشکێنی بەرکەوتووە."