هەرێم نیوز
دەستەی سەربەخۆی مافی مرۆڤ، کەسوکاری گیراوانی لالەزار ئاگادار دەکاتەوە و دەڵێت: ڕۆژانەی یەکشەممە و دووشەممەی داهاتوو، دەتوانن سەردانی ڕۆڵەکانیان بکەن.
ئەمڕۆ هەینی، دەستەی سەربەخۆی مافی مرۆڤ، لە ڕاگەیەنراوێکدا كه‌سوكاری گیراوانی لاله‌زار، لە بارەی سەردانیکردنی ڕۆڵەکانیان ئاگادار دەکاتەوە.
دەستەی سەربەخۆی مافی مرۆڤ لەهەرێمی کوردستان له ڕاگه‌یه‌ندراوێكدا باسی له‌وه‌كردوه، "لەبەردەوامی هەوڵەکان بۆ سۆراغکردنی ئەو کەسانەی تا ئێستا چارەنوسیان دیارنەبوە یان سەردانیان نەکردون، خانەوادەی ئەو کەسانە ئاگادار دەکەینەوە کە ئەندامی هێزەکانی دوپشک بون و لە شەڕەکەی 22ی ئاب لەلالەزار بەشداربون و ئێستا لای ئاسایشی سلێمانی ڕاگیراون، كه‌سوكاریان دەتوانن سەردانی کوڕەکانیان بکەن".
ئاماژه‌ی به‌وه‌شكردوه، ده‌سته‌ی مافی مرۆڤ هەماهەنگی لەگەڵ دەزگای ئاسایشی گشتی / سلێمانی كردوه و ئاگاداریان کردونەوە کە ڕۆژانی یەکشەممە و دوشەمەی داهاتو کە هاوکاتە لەگەڵ 1ی 9ی 2025 و 2ی 9ی 2025 کەسوکاریان دەتوانن سەردانی کوڕەکانیان بکەن.
ئەمەش لە کاتێکدایە، به‌ره‌به‌یانی 22ی ئه‌م مانگه هێزێكی ده‌وروبه‌ری هۆتێل لاله‌زار (باره‌گای سه‌ره‌كی به‌ره‌ی گه‌ل و ماڵی لاهور شێخ جه‌نگی) گرت و شه‌ڕ و ڕوبه‌ڕوبونه‌وه ڕویدا و 162 كه‌س له هێزی دوپشك ده‌ستگیركران.