هەرێم نیوز
شاخه‌وان عه‌بدوڵا جێگرى سه‌رۆكى په‌رله‌مانى عێراق له وه‌ڵامى رێبوار ته‌ها پارێزگارى كه‌ركووك رایدەگەیەنێت، "هه‌فته‌یه‌كه خۆت و كابه‌رایه‌ك وازتان له ئه‌ركه‌كانتان هێناوه و خه‌ریكى وه‌ڵامدانه‌وه‌ى منن و منیش حه‌زم له له شه‌ڕه ده‌نووك نییه" له به‌شێكى ترى روونكردنه‌وه‌كه‌ى شاخه‌وان عه‌بدوڵا به رێبوار ته‌ها ده‌ڵێت، "ئێوه له دواى 16ى ئۆكتۆبه‌ر له به‌غدا بوون، كه‌چى سووكایه‌تى به ئاڵاى كوردستان ده‌كرا ئه‌گه‌ر ئاڵاى كوردستان به مه‌دالیایش بووایه لێيان ده‌كرده‌وه".
شاخەوان عەبدوڵا لە وەڵامەكەیدا رایگەیاند: سەرەتا وەک ئەوەی ئێوە کەسانێک بن هیچ هەڵە و کەموکوڕیتان نییە و نابێت کەس رەخنەتان لێبگرێت، ئەوەتا هەفتەیەکە خۆت و کابرایەک کە لە ئەنجوومەنی پارێزگایە، وازتان لە هەموو ئەرکێکتان هێناوە وخەریکی وەڵامدانەوەی منن، خۆزگە لە جیاتی ئەو هەموو بێڕێزی و وەڵامکارییە، نووسراوێکت ئاڕاستەی وەزارەتی کارەبا دەکرد و دەتگوت فەرموو کاک شاخەوان ئیتر خۆت و خەڵکی ئەو ناوچانە نیگەران مەبن، ئەو بڕیارەم هەڵوەشاندەوە، کە تائێستا نەتکردووە.
ئاماژەی بەوەشداوە: لە وەڵامی دوایین لێدوانیشتان بۆ کەناڵی ٨، کە دەڵێیت یەک پڕۆژەی پەرلەمانتار شاخەوان عەبدوڵا بڵێن کە بۆ کەرکووکی کردبێت. پێش ئەوەی وەڵامت بدەمەوە، ئەوەی من بناسێت، دەزانێت حەزم بە ململانێ و شەڕەدەنووک لە نێوان خۆمان وەکوو کورد نییە و شەڕی من لەگەڵ خەڵکی شۆڤێنیی داگیرکەرە، بۆ ئەو بابەتەش بەم چەند خاڵە وەڵامت دەدەمەوە:
یەکەم: جەنابت دەڵێیت کاک شاخەوان چی کردووە بۆ کەرکوک؟ گەورەترین پڕۆژەی من لە کەرکووک، هەمواری یاسای هەڵبژاردنی ئەنجوومەنی پارێزگاکان بوو بە شێوەیەک کە لە کەرکووکیش هەڵبژاردن ئەنجام بدرێت و راکان جبووری نەمێنێت و جەنابت ببیتە فەرمانبەری پارێزگای کەرکووک، کە ٢٠ ساڵە هەڵبژاردن نەکراوە.
دووەم: لە هەمووی گرنگتر، جەنابت و ٥ پەرلەمانتاری تری کورد لە دوای ١٦ی ئۆکتۆبەر تا ساڵی ٢٠٢١ لە بەغدا بوون، بەڵام رۆژانە سووکایەتی بە ئاڵای کوردستان دەکرا و ئەگەر میدالیای قەد ئاوێنەی ئۆتۆمبێلیش بوایە لێیان دەکردەوە، بەڵام من وێڕای هەموو هەڕەشەکان، لە مانگی ٩ی ساڵی ٢٠٢١ ئاڵای كوردستانم هێنایەوە کەرکووک و سەرەتا لەسەر نووسینگەی خۆم هەڵم دا و دواتریش بۆسەر بارەگاکانی پارتی دوای گەڕانەوەیان بۆ کەرکووک.
سێیەم: یەکێکی تر لە پڕۆژە گەورەکانی کەرکووک و دەوروبەری تا مەندەلی و خانەقین، هەڵوەشاندنەوەی بڕیارەکانی بەعس و گەڕانەوەی زەوییەکانە بۆ خاوەنە رەسەنەکانیان.
چوارەم: پرۆژەی گەیاندنی خزمەتگوزاری بۆ گەڕەکە کوردییەکان کە خەڵکی کەرکووک باش دەزانن رێگە نەدەدرا پڕۆژەیان بۆ بکرێت بە بیانووی ئەوەی ئەو گەڕەکانە زێدەڕۆن، بەڵام لە مانگی ٤ ی ساڵی ٢٠٢٢ نووسراوێکمان ئاڕاستەی سەرۆک وەزیرانی پێشوو مستەفا کازمی کرد، کە ئەو گەڕەکانە واقیعی حاڵن و لەسەر بنەمای ئەوە، بڕیار درا پڕۆژەکانیان بکرێت و دەست کرا بە دروستکردنی شەقام و کۆنکریتکردنی گەڕەکە کوردییەکان.
پێنجەم: پڕۆژەی ئاوی پەنجا عەلی، کە ٢٠ ساڵە ئاوی سوێر دەخۆن و بێئاو بوون، ئێمە سەرەڕای رێگرییەکانی راکان جبووری، ئەو پرۆژەیەمان ئەنجام دا و ڕەزامەندیی وەزیری شارەوانیمان هێنا و تێچووەکەیشی دابین کرا، سوپاس بۆ خودا کێشەی کەمئاوی لەو گەڕەکە چارەسەر کرا، جگە لەوە پڕۆژەی لێدانی چەندان بیر لە گەرەکی رزگاری (فەیلەق)، هەروەها کۆنکریتکردنی سەدان کۆڵان و دابینكردنی دەیان محاویلەی کارەبا بۆ گەڕەکە کوردییەکان و ئەنجامدانی شەقامی جووتسایدی پەنجا علی کە لە گەڕەکێکی ترەوە گواستمانەوە بۆ پەنجا علی و دەیان پرۆژەی تر.
شەشەم: لەسەر ئاستی نەتەوەیی سەرلەنوێ زیندووکردنەوەی مادەی ١٤٠ دوای ١٢ ساڵ لە راگرتنی و دەستپێکردنەوە بە قەرەبووکردنەوەی هاووڵاتیان و هێنانی بڕیاری پارچەزەوییەک بۆ ئاوارەکان.
حەوتەم: تێپەڕاندنی یاسایی بەپارێزگابوونی هەڵەبجە
هەشتەم: هەمواری هەردوو پرۆژەیاسای شەهیدان و زیندانیانی سیاسی لە بەرژەوەندیی خەڵکی کوردستان.
نۆیەم: وەرگرتنەوەی ٣٧٥ ملیار دیناری جووتیارانی کوردستان هی ساڵەکانی ١٤ و ١٥ و ١٦ و جێکردنەوەی لە یاسای ئاسایشی خۆراک.
دەیەم / نەهێشتنی سەربازگەی شۆراو و هەڵكوتانە سەر گەڕەکە کوردییەکان لە نیوەی شەودا، لەگەڵ سەدان پرۆژەی تری گەورە، کە بە هەموو ئەو بەرپرس و ناوە گەورانەی کورد نەکرا كە لە بەغدا بوون و ئێمە کردمان.
یازدە: تەرخانکردنی بودجە بۆ لیوای ٢٠ی هاوبەش و تەواوکردنی مامەڵەکانیان کە بە هۆیەوە ٣٧٠٠ گەنجی ئیمە دامەزران.
راشیگەیاند: ئەوە بەشێکی کەمە لە پرۆژەکانی من، بەڵام جەنابت پێم بڵێ جگە لە هەڵگرتنەوەی کلێنس و مەقەبا و تەسلیمکردنی قەزاكانی دوبز، داقووق و پۆلیس و بەڕێوەبەرایەتیی کشتوکاڵی کەرکووک بە برایانی حەویجە، ماوەی ساڵێکە چی پڕۆژەیەکی دیكەت بۆ كەركووك کردووە؟ من رێبوارێکم دەویست قائد بێت نەک مۆزەف.
لەکۆتاییدا شاخەوان عەبدوڵا دەلێت: خۆزگە لە پاڵ وەڵامدانەوەی من، وەڵامێکی دوایین بابەتی محەمەد تەمیمتان دەدایەوە، یاخود وەڵامی حەلبووسیتان دەدایەوە، کە لەناو کەرکووک و لە شارێکی زۆرینە کوردیدا، سووکایەتی بە حوکمی کوردی و سەرکردەکانی کورد کرد.
ئەمەش لە کاتێکدایە،رێبوار تەها پارێزگارى کەرکوک کە لە بەرنامەیەکی کەناڵ8 گوتبووى، شاخەوان عەبدوڵا یەک پرۆژەى بۆ کەرکوک نەکردووە.