هەرێم نیوز
كۆمسیۆنی هەڵبژاردنەكانی عێراق، ڕایگەیاند، نابێت ژمارەكان بەمەبەستی بانگەشە بڵاوبكرێنەوە، دەشڵێت،"راگەیاندنی ژمارەی هاوپەیمانی و حزب و كاندیدە تاكەكەسییەكان بەواتای دەستپێكردنی هەڵمەتی بانگەشەی هەڵبژاردن نییە".
ئەمڕۆ یەكشەممە، كۆمسیۆنی باڵای سەربەخۆی هەڵبژاردنەكانی عێراق، لە ڕاگەیەندراوێكدا بڵاویكردەوە، راگەیاندنی ژمارەی هاوپەیمانی و حیزب و كاندیدە تاكەكەسییەكان بەواتای دەستپێكردنی هەڵمەتی بانگەشەی هەڵبژاردن نییە.
ئاماژەی بەوەشكرد، نابێت ژمارەكان بەمەبەستی بانگەشە بڵاوبكرێنەوە تا ئەوكاتەی ئەنجومەنی كۆمسیاران لیستی كۆتایی كاندیدەكان پەسەند دەكات و دەستپێكردنی بانگەشەی هەڵبژاردن رادەگەیەندرێت.
ئەوەش لەكاتێكدایە ئێوارەی دوێنێ شەممە، كۆمسیۆنی باڵای سەربەخۆی هەڵبژاردنەكانی عێراق، لە مەراسیمێكدا تیروپشكی بۆ دیاریكردنی ژمارەی پارت و هاوپەیمانی و پێكهاتەكان بۆ هەڵبژاردنی ئەمساڵی پەرلەمانی عێراق كرد كە بە وتەی بەرپرسانی كۆمسیۆن، هەر كورسییەك لە هەڵبژاردنی ئەمساڵ بەرامبەر 100 هەزار دەنگ دەبێت.
ژمارەی لایەنەكانی كوردستان بۆ هەڵبژادنی پەرلەمانی عێراق:
-پارتی دیموكراتی كوردستان بە ژمارە 275 بەشداری هەڵبژاردن دەكات
-یەكێتی نیشتیمانی كوردستان بە ژمارە 222 بەشداری هەڵبژاردن دەكات
-یەكگرتوی ئیسلامی كوردستان بە ژمارە 278 بەشداری هەڵبژاردن دەكات
-جوڵانەوەی نەوەی نوێ بە ژمارە 288 بەشداری هەڵبژاردن دەكات
- رەوتی هەڵوێست بە ژمارە 225 بەشداری هەڵبژاردن دەكات
- بەرەی گەل بە ژمارە 261 بەشداری هەڵبژاردن دەكات
- كۆمەڵی دادگەری كوردستان بە ژمارە 285 بەشداری هەڵبژاردن دەكات
-حزبی سۆسیالیست دیموكراتی كوردستان بە ژمارە 216 بەشداری هەڵبژاردن دەكات