هەرێم نیوز
رۆژنامه‌ى ئه‌خبارى لوبنانى بڵاویکردۆتەوە جگه له ئه‌مه‌ریكا، چه‌ندان وڵاتى تر گوشار ده‌خه‌نه سه‌ر عێراق بۆ ئه‌وه‌ى یاساى حه‌شدى شه‌عبى په‌سند نه‌كرێت . ئه‌مه‌یش وایكردووه لایه‌نه عێراقییه‌كان سڵ له تێپه‌ڕاندنى یاساكه بكه‌نه‌وه و له‌وه بترسن تێپه‌ڕاندنى یاساكه، ببێته هۆى ته‌نگژه‌یه‌كى ناوخۆیى و هه‌رێمایه‌تى.
ئه‌مڕۆ چوارشه‌ممە،، رۆژنامه‌ى ئه‌خبار له‌سه‌ر زارى چه‌ند په‌رله‌مانتارێكى عێراقى ئاشكراى كردووه، سه‌ره‌ڕاى ئه‌مه‌ریكا، چه‌ندان وڵاتى تر له‌سه‌ر ئاستى ناوچه‌كه و نێوده‌وڵه‌تى گوشار ده‌خه‌نه‌سه‌ر حكوومه‌تى عێراق بۆ ئه‌وه‌ى رێگه نه‌دات یاساى حه‌شدى شه‌عبى تێپه‌ڕێت. حوسێن عه‌ره‌ب په‌رله‌مانتارى سه‌ربه‌خۆ له عێراق رایگەیەند "چه‌ندان وڵات و باڵوێزخانه‌ى وڵاتانى ناوچه‌كه و دنیا، به ئاشكرا گوشار ده‌كه‌ن بۆ ئه‌وه‌ى رێگریى له تێپه‌ڕاندنى یاساكه بكرێت".
هه‌مان رۆژنامه لێدوانى له سه‌لام زوبه‌یدى وه‌رگرتووه كه په‌رله‌مانتارى هاوپه‌یمانى نه‌سره و وتوویه‌تى، "نه‌بوونى یاساكه له كارنامه‌ى په‌رله‌مان ماناى ئه‌وه‌یه به رانه‌گه‌یه‌نراوى دواخراوه و تێپه‌ڕاندنى یاساكه له‌م بارودۆخه‌ى ئێسته وه‌ك بابه‌تێكى مه‌حاڵه، بۆ خۆدوورگرتن له گوشاره‌ك بۆ خولى داهاتوو دوا ده‌خرێت".
باسى له‌وه‌ش كردووه كێشه‌كه ته‌نیا واشنتن نییه، له ناوخۆیش له‌سه‌ر ئاستێكى فراوان ره‌ت ده‌كرێته‌وه، له‌لاى سوننه و كورد و ته‌نانه‌ت هه‌ندێك لایه‌نى چوارچێوه‌ى هاوئاهه‌نگیش ره‌تى ده‌كه‌نه‌وه، بۆیه ترسى ئه‌وه هه‌یه تێپه‌ڕاندنى یاساكه ببێته هۆى هه‌ڵگیرساندنى كێشه‌ى ناوخۆ و ناوچه‌كه".
دووجار خوێندنەوەی هەمواری یاساکەی حەشد لەلایەن شیعەکانەوە بەبێ بەشداری پەرلەمانتارانی کورد و سونە بووە و فرسەت هێنان بووە لەکورد و سونە، هەر دەنگدانی کۆتایی ماوە، ئەم هەمووارەش دوای ئەوەهات کە ئەمریکییەکان لەساڵانی پێشودا چەندجارێک هێرشیان لەلایەن ئەم گروپانەوە کراوەتەسەر، بۆیە ئەمریکییەکان داوای چەککردنی حەشد و هەڵوەشاندنەوەیان کردووە و ئەوانیش دەیانەوێت دەستپێشخەری بکەن و حەشد لەو چەککردن و هەڵوەشاندنەوە نەک هەر بپارێزن، بەڵکو گەورەتر و بەهێزتری بکەن.
حەشدی شەعبی، کە هێزێکی چەکداریی سەر بە دەوڵەتی عێراقە و لە دەیان گرووپی جۆراوجۆر پێکدێت. ئەم هێزە لە ساڵی 2014 و لە دوای فەتوایەکی عەلی سیستانی، مەرجەعی باڵای شیعەکانی عێراق، بۆ بەرەنگاربوونەوەی ڕێکخراوی داعش دامەزراوەو لەساڵی 2016 دا بەیاسا بونە هێزی فەرمی عێراق و بودجەی ئەم هێزە ساڵانە بەبەردەوامی زیاد دەکات، بەڕادەیەک لەبودجەى 2023 دا (12%)ـى بودجەى هەموو عێراقیان بۆ دابینکراوە کە دەکاتە نزیکەى بودجەى هەموو هەرێمی کوردستان.
هەرچەندە لە سەرەتادا وەک هێزێکی خۆبەخشی نیشتمانی دەرکەوتن و پێکهاتەی سوننە و مەسیحی و ئێزیدیشی لەخۆدەگرت، بەڵام زۆرینەی باڵادەستی هێزەکە لە گرووپە شیعەکان پێکدێت کە زۆربەیان پەیوەندییەکی نزیکیان لەگەڵ ئێراندا هەیە و لە نێو سەرکردایەتى ئەو گروپانەدا هیچ بەرپرسیارێتییەک نەدراوە بە پێکهاتەکانى دەرەوەی خۆیان.
لەئێستاشدا هەوڵێک هەیە بۆ ئەوەی هەمواری یاسای ژمارە 40ی ساڵی 2016ی حەشدی شەعبی بکرێتەوەو حەشد بکرێتە دامەزراوەیەکی تەریب بەسوپای عێراق.