هەرێم نیوز
سه‌رۆكى په‌رله‌مانى عێراق، دانیشتنى دوێنێى په‌رله‌مان به "نادروست" ده‌زانێ و له راگه‌یه‌نراوێكدا دووپاتى ده‌كاته‌وه، به‌شێوه‌یه‌كى نایاسایى موحسین مه‌نده‌لاوى جێگرى سه‌رۆكایه‌تیى دانیشتنه‌كه‌ى كردووه، له كاتێكدا سه‌رۆك په‌رله‌مان ئاماده بووه.
ئه‌مڕۆ چوارشه‌ممە، مه‌حموود مه‌شهه‌دانى سه‌رۆكى په‌رله‌مانى عێراق، له راگه‌یه‌نراوێكدا دانیشتنى دوێنێ به "نادروست" وه‌سف ده‌كات و رایدەگەیەنێت "به‌گوێره‌ى ماده‌ى 34 بڕگه‌ى دووه‌م له پێڕه‌وى ناوخۆى ئه‌نجوومه‌نى نوێنه‌ران، كه تێكست له‌سه‌ر ئه‌وه ده‌كاته‌وه ئه‌ركى ئێمه‌یه ده‌ست به دانیشتنه‌كان بكات و سه‌رۆكایه‌تى كات، كه‌چى جێگرى یه‌كه‌م دانیشتنه‌كه‌ى كردووه به پێچه‌وانه‌ى ئه‌مه، هه‌رچه‌نده ئێمه له ئه‌نجوومه‌ن ئاماده بووین و غایب نه‌بووین یان پۆزشمان به ئه‌نجامنه‌دانى ئه‌ركه‌كه‌مان نه‌هێناوه‌ته‌وه، رێگه‌مان به‌و نه‌داوه دانیشتنه‌كه بكاته‌وه".
ئاماژەی بەوەشداوە، "ئه‌و دانیشتنه دروست نییه و هه‌ژمار ناكرێت، چونكه له‌سه‌ر بنه‌ماى پووچه‌ڵ بووه، بۆیه پووچه‌ڵ ده‌كرێته‌وه".
ئەمەش لە کاتێکدایە، دوێنێ له په‌رله‌مانى عێراق كاتێك مه‌شهه‌دانى له هۆڵ چووه‌ته ده‌ره‌وه، موحسین مه‌نده‌لاوى جێگرى یه‌كه‌م په‌رله‌مان، ویستى چه‌ند بڕگه‌یه‌ك بۆ كارنامه‌ى په‌رله‌مان زیاد بكات و له ئه‌نجامى ئه‌مه گرژیى دروست بوو.