هەرێم نیوز
سەڵاحەدین دەمیرتاش، هاوسەرۆکی پێشووی پارتی دیموکراتی گەلان (هەدەپە) کە ئێستا لە زینداندایە، لە ڕێگەی عومەر فاروق گەرگەرلیئۆغڵو، پەرلەمانتاری پارتی یەکسانی و دیموکراسیی گەلان (دەم پارتی)ـەوە، پەیامێکی بڵاوکردەوە.
لە پەیامەکەیدا، دەمیرتاش وێڕای ناردنی سڵاو بۆ دۆست و لایەنگرانی، جەختی لەسەر بەردەوامبوون لە خەباتی دیموکراسی و سووربوون لەسەر داوای ئاشتی کردەوە. ناوبراو هیوای خواست کە ئاشتی ببێتە هۆی کردنەوەی لاپەڕەیەکی نوێ لە تورکیا.
دەقی پەیامەکەی سەڵاحەدین دەمیرتاش:
"لە ڕێگەی پەرلەمانتارە بەڕێزەکەمان، بەڕێز گەرگەرلیئۆغڵوەوە، سڵاوێکی پڕ بە دڵ و خۆشەویستیمان ئاراستەی هەموو ئەو دۆستانە دەکەین کە سڵاو و هەستی هاوپشتییان ناردووە.
لەکاتێکدا بەبێوچان درێژە بە خەباتی خۆمان دەدەین بۆ دادپەروەرییەکی ڕاستەقینە، یەکسانی و دیموکراسی بۆ هەمووان، هاوکات سوور دەبین لەسەر وتنی ئاشتی.
هیوادارین بە هاتنی ئاشتی، لاپەڕەیەکی نوێ لە تورکیا هەڵبدرێتەوە و زەمینەیەکی زۆر بەهێزتر بۆ بونیادنانی داهاتوویەکی ڕووناک پێکەوە بێتە ئاراوە.
بە هیوای ڕۆژانی پڕ لە ئازادی."