هەرێم نیوز
كۆمپانیای دانەغازی ئیماڕاتی ڕایگه‌یاند، به‌رهه‌مهێنانی غازی سروشتیان له كێڵگه‌ی كۆرمۆر گه‌یاندوه‌ته ئاستی به‌رهه‌مهێنانی 500 ملیۆن بەرمیل هاوتای نەوت، كه ئه‌وه‌ش ده‌ستكه‌وتێكی گرنگه، ده‌شڵێت، 20 هه‌زار هه‌لی كاری ڕاسته‌وخۆ و ناڕاسته‌وخۆیان ڕه‌خساندوه.
ئەمڕۆ پێنجشەممە، 3ـی 4ی 2025، کۆمپانیای دانەغازی ئیماراتی لە ڕاگەیەندراوێکدا ئاشکرای کرد، لەسەرەتای مانگی (3/ئادار)ەوە ئاستی بەرهەمهێنانیان لە کێڵگەی کۆرمۆر بۆ 525 ملیۆن پێ سێجای رۆژانە بەرزکردۆتەوە.
بە گوێرەی راگەیەندراوەکە، رێژەی بەرهەمهێنان لەو کێڵگەیەدا لە ساڵی 2017ـەوە بە رێژەی 75% زیادیکردووە، ئەمە جیا لە 15 هەزار و 200 بەرمیلی لە پێکهاتەی خەستبووی گازەکە، هەزار و 70 تۆنی ڕۆژانە لە پێکهاتەی دیکە کە بەگازی نەوتیی ناسراوە.
هەروەها کۆمپانیاکە ئاماژە بەوە دەکات، لەگەڵ هاوبەشەکانیان کار لەسەر پەرەپێدانی کۆرمۆر 250 دەکەن، کە تاوەکو چارەگی یەکەمی ساڵی 2026 ئاست و توانای وەبەرهێنان لە کێلگەکە بە رێژەی 50% زیاد دەکرێت، بەتایبەت لەم چەند مانگەی دواییدا بە بەهای یەک ملیار دۆلار لە ڕێگەی پەرەپێدانی خێرا ئاست و ڕووبەری کێڵگەکە فراوانکراوە.