هەرێم نیوز
تاران لەبەردەم دوو رێیانێکى سەختدایە، یان ئەوەیە دەبێت مل بە رێککەوتن لە بارەى چەکە ئەتۆمییەکەیەوە لەگەڵ ئەمریکا بدات کە ئەمە بە ماناى وازهێنان و لە قاڵبدانیەتى، یان ئەوەیە هێرشى دەکرێتە سەر و ئەوەش پەلێکێشیەتى بۆ نێو تونێلێک کە ئەو سەرى دیارنییە، دیارنییە ئاخۆ دەفعەکانى ئیسرائیل بە هێرشکردنى ئەمریکا چۆن دەبێت و کاردانەوەکانى ئێرانیش چى دەبێت، بەڵام ئەوەى کە زانراوە ئەوەیە وڵاتانى ناوچەکە بەبێ زیان و پریشکى ئاگرەکە دەربازیان نابێت.
کارادنەوە سەرەتاییەکان لە جوغزی وەڵامدانەوەى ئێراندا ماوەتەوە و بۆ هەر هەنگاو و لێدوانێکى ئەمریکا ئێران وەڵامی تایبەت بەخۆی و بەگوێرەى قۆناغەکە هەیە، لەگەڵ کۆتا دیاریکردنى وادە بۆ ئێران، عەلى لاریجانی راوێژکاری رێبەرى کۆماری ئیسلامی ئێران رایگەیاندووە ئەگەر ئەمریکا هێرش بکاتە سەرمان ناچارمان دەکات بە بەرهەمهێنانى چەکی ئەتۆمی و پێشێلکارییەکى بێ چەندوچوونى مافە نێودەوڵەتییەکانە، ئەم لێدوانەى لاریجانی وێڕای ئەوەى رەتیدەکاتەوە کە لە ئێستادا ئەو چەکە بەردەستبێـت، لە لایەکی تریشەوە ماناى مانەوە و بەردەوامی سیستمەکە دەدات و بە ناراستەوخۆ دەڵێت هێرشەکان کاریگەریی ئەوتۆی نابێت.ئەمیر سەعید ئیرەوانى باڵیۆزی هەمیشەیی ئێران لە نەتەوە یەکگرتووەکانیش لە نامەیەکدا کە ئاڕاستەى سکرتێری گشتى نەتەوەیەکگرتووەکانى کردووە و تیایدا باس لە ئەگەرى هێرشى ئەمریکا دەکات بۆ سەر ئێران و رایگەیاندووە لەوەها هەلومەرجێکدا ئێران بە بێ چەند و چوون بە قەبارەى هێرشەکە وەڵامی دەبێت. لە هەمان کاتیشدا باڵیۆزەکەى ئێران لە نەتەوە یەکگرتووەکان داواى لە ئەنجوومەنی ئاسایش کردووە کە گوتەکانى ترەمپ مەحکووم بکات.
لەگەڵ ئەوەشدا تا ئێستا ئێران بەردەوام جەختى لەوە کردووەتەوە کە بیەوێت چەکی ئەتۆمی دروستبکات و تەنانەت عەلى خامنەیی رێبەریش وەک چەکێکى قەدەغەکراوى ئایینى و حەرام سەیری کردووە، بەڵام لەم سەرووبەندەی هێرشە زارەکییانەى ئەمریکادا سەبارەت بە ئێران ئێستا گەورە بەرپرسان باس لەوەدەکەن کە لە ئەگەرى هێرشەکەدا بەخێرایی بەرەو دەستخستنى ئەتۆم هەنگاو دەنێت، ئەوەش بەو مانایە دێت کە کارکردنى ئێران لەو بوارەدا بێ پێشیینە نییە و کارى بۆکراوە .
لاریجانى لە پەیامێکدا بە بەرپرسانى ئەمریکیشى گوتووە ئەگەر ئەمریکا هێرشیان بکاتە سەر ئەوا دەکەونە ژێر فشارى خەڵکەکەى خۆیان و ناچارن دەست بۆ بەرهەمهێنانى ئەتۆم ببەن، هەرچەندە ئەویش وەک خامنەیی لەو بڕوادایە کە ئەمریکا فشارە دەیکات و بە واقیعی هێرش ناکاتە سەر ئێران چوون ئەویش دەزانێت هێرش دەکاتە سەرکوێ، کەشتییە زەبەلاحەکانى لەژێر دەستى موشەک و درۆنەکانی ئێراندایە، ئەوە جگە لەوەى بە تەواوەتی دەستى بەسەر کەنداوى عەرەبیدا دەشکێت و دەتوانێت سەرجەم ئەو نەوتەى کە لە وڵاتانى نیوەدورگەى عەرەبەوە بەرەو بازاڕەکانی جیهان دەڕوات کۆنترۆڵی بکات و ئەوەش دەبێتە زیانێکى گەورە لەسەر ئاستى جیهان.
ئەمیر عەلی حاجیزادە، فەرماندەى هێزە ئاسمانیەکانى ئێرانیش بە شێوەیەکى تەنز ئامێز لە کاردانەوەى گوتەکانى ترەمپدا گوتوویەتى لانى کەم پەنجا هەزار سەربازی ئەمریکا و دەیان پێگەیان لەبەردەستماندان، بڕواناکەم کەسێکى ژیر ماڵی لە شووشەبێت و شەڕەبەرد بکات، یان بەرد بگرێتە کەس.
ئەوەى ماوەتەوە بگوترێت ئەوەیە بپرسین ئاخۆ ئێران وەک غەزە و سوریاى ئەسەد بەبێ کەس و لێپرسینەوە دەمێنێتەوە؟ یان ئەوەیە ئەویش هاوپەیمانیەتییەکەى -چین و روسیا- کە دوو خاوەن ئەتۆمن دێنە جواب لەسەرى و لانى کەم ناهێڵن هەمان چارەنووسى ئەسەد روبەڕووی خامنەیی ببێتەوە.