هەرێم نیوز

ڕۆژنامەی هائارتزی ئیسرائیلی بڵاویکردەوە، لە سەرەتای دەستپێکردنی شەڕی غەززەوە، سوپای ئەمریکا زۆرترین بڕی کەرەستەی سەربازیی خۆی لە ڕۆژهەڵاتی ناوەڕاست و نزیک ئێران و یەمەن جێگیرکردووە. ژمارەی گەشتە گواستنەوەکانی ئەمریکا لە ناوچەکە لە مانگی ئازاردا بە بەراورد بەو کاتە بە ڕێژەی ٥٠% زیادی کردووە.

ئەم کارە لە کاتێکدایە کە ئەمریکا بەردەوامە لە ئۆپەراسیۆنەکانی لە یەمەن و نزیک دەبێتەوە لەو وادەیەی دۆناڵد ترەمپ بۆ ئێران سەبارەت بە بەرنامە ئەتۆمییەکەی دیاریکردبوو.

تەنها لە مانگی ئازاردا لانیکەم 140 فڕۆکەی گواستنەوەی قورس لە ئەمریکا لە قەتەر، بەحرەین، ئیمارات، سعودیە، کوەیت و ئوردن نیشتنەوە.

ڕۆژنامەکە نووسیویەتی زۆربەی ئەو گەشتانە لە بنکە سەربازییە سەرەکییەکانی ئەمریکاوە ئەنجام دراون و کەرەستەی سەربازییان تێدابووە.

وێنە مانگە دەستکردەکانی بنکەی ئەمەریکا لە دوورگەی دیێگۆ گارسیا لە زەریای هیندستان دەریدەخات، کە لانیکەم شەش فڕۆکەی بۆمبهاوێژی B-2 لە بنکەکەدا جێگیرکراون.

لە ڕێگای ئەو بنکەدا فڕۆکەی بۆمبهاوێژی زیاتر بینراون و ڕەنگە هەندێکیان لە شاردبنەوە بۆ ئەوەی بە مانگی دەستکرد نەدۆزرێتەوە.

ئەم قەبارەیە لە ئامێرە سەربازییەکان نزیکەی یەک لەسەر سێی بەلەمی فڕۆکە بۆمبڕێژکراوەکانی هێزی ئاسمانی ئەمریکا لەخۆدەگرێت.

دیێگۆ گارسیا کە نزیکەی چوار هەزار کیلۆمەتر لە ئێرانەوە دوورە، پێشتر وەک خاڵی بۆردومان بۆ ئەفغانستان و عێراق بەکارهێنرابوو.

بەگوێرەی ڕاپۆرتەکە، ئەمە مەودایەکی گونجاوە بۆ پاڵپشتیکردنی هێرشی بەرفراوان بۆ سەر ئەو دوو وڵاتە، هاوکات مەوداکەشی بەجۆرێکە کە لەدەستی فڕۆکەی بێفڕۆکەوان و مووشەکی بالیستیک ئەو دوو وڵاتەش بەدوورە.

لە مانگی تشرینی یەکەمی ساڵی ڕابردوودا فڕۆکە بۆمبڕێژکراوەکانی B-2 بەشدارییان لە هێرشەکانی سەر کۆگاکانی ژێرزەمینیی چەک لە یەمەن کرد.

دۆناڵد ترەمپ لە کۆتایی هەفتەدا وتی: ئەگەر ڕێککەوتنێک نەکرێت، ئێران بۆردومان دەکرێت، بۆردومانێکی هاوشێوەی ئەو بۆردومانانەی کە هەرگیز نەیانبینیوە.

ئێران لە وەڵامدا ڕایگەیاند کە "لەژێر فشاردا دانوستان ناکات و دەزانێت چۆن وەڵامی هەر هێرشێک بداتەوە".

سەرەڕای ئەم قسەکردنە، پێدەچێت کەناڵێکی دیپلۆماسی شاراوەش لە ئارادایە، کە ڕەنگە دواجار ببێتە هۆی گفتوگۆ.

هاوکات ئەکسیۆسی ئەمریکی لە زاری سەرچاوەیەکەوە کە ناوی نەهێنراوە ڕایگەیاندووە کە کۆشکی سپی بە جددی بیر لە پێشنیاری ئێران دەکاتەوە بۆ دانوستانی ناڕاستەوخۆی ئەتۆمی، بەڵام لە هەمان کاتدا هێزەکانی ئەو وڵاتە لە ڕۆژهەڵاتی ناوەڕاست بە شێوەیەکی بەرچاو زیاد کراون بۆ ئەوەی ئامادە بن بۆ ئەنجامدانی هێرشی سەربازی ئەگەر دۆناڵد ترەمپ فەرمانی پێبدات.