هەرێم نیوز

دوای ڕۆژووی مانگی ڕەمەزان جەستەی مرۆڤ لە سەر شێوازێكی دیاریكراو لە خواردن ڕادێت ئەمەش دەبێتە هۆی ئەوەی خواردنی بڕێكی زۆر لە خۆراك لە ڕۆژانی جەژن و بەتایبەت نانی بەیانی یەكەم ڕۆژ كاریگەری نەرێنی بۆ سەر تەندروستی مرۆڤ هەبێت.

‎دكتۆر كامەران ڕەسوڵ ژاژڵەیی، پسپۆڕی زانستی خۆراك، پزیشكی پسپۆڕی خۆراك چەند ڕێنماییەك بڵاودەكاتەوە.

ــ ڕێنمیاییەكانی خۆراكی تەندروست بۆ جەژنی ڕەمەزان :
۱ ـــ باشتر وایە نانی بەیانی ڕۆژانی جەژن هەمان خۆراكی پارشێوی مانگی ڕەمەزان یان هاوشێوەی نانی بەیانی ڕۆژانی پێش ڕەمەزان بێت: وەك نان و ماست ، پەنیر ، هێلكە ، هەوڵ بدرێت خواردنی نەریتی بەیانی یەكەم ڕۆژ دوا بخرێت و نیوەڕۆ بخورێت.
۲ ـــ ئەگەر هاوشێوەی ساڵانی ڕابردوو بەیانی یەكەم خواردنی جەژن ئامادە كرا، ڕەچاوی ئەم خاڵانە بكەین :
– خواردنی بڕێكی كەم لە برنج و شلە، هەوڵ بدرێت یەك جۆر شلە بخورێت .
– یەك جۆر گۆشت لێ بنرێت یان بخورێت و بڕی كەم و بێ چەوری و بەزی لێ بخورێت نەوەك گۆشتی سوور و مریشك و قەل هەمووی لە یەك كات ؛ ئەوەی تری هەڵگرە بۆ ژەم و ڕۆژەكانی دیكە جەژن ، هەڵبەت باشتریشە بیبەخشیت بە خێزانە كەم دەرامەتەكان.

– یاخود بەیانیەكەی یەك یان دوو شیش گۆشت یان سینگی مریشك یان جگەری برژاو بخورێت لە جیاتی برنج و شلە .

۳ ـــ خواردنی ژەمی نیوەڕۆ و ئێوارە لە كاتی خۆی دا ، گرنگە ئێواران خواردنی سووك بخورێت.
٤ ـــ خواردنەوەی بڕێكی زۆر لە ئاو لە نێوان ژەمەكان بەدرێژایی ڕۆژەكە بە تایبەت لەگەڵ بەرز بوونەوەی پلەی گەرما و زیاتر هیلاك بوون لە چاو ڕۆژانی ڕەمەزان.
٥ ـــ خۆت بە دوور بگرە لە خواردنەوەی شەربەتی گیراوە و خواردنەوە گازییەكان، ئەگەر حەزت لێكرد شەربەتی فرێشی كەم شەكر بخۆرەوە .
٦ ـــ دووركەوتنەوە لە خواردنی شیرینی و بڕێكی زۆر لە چەرەس ، ئەگەر خواردت بڕێكی كەم لە چەرەسی كاڵ و كەم سوێری بخۆ.
۷ ـــ خواردنی سەوزە و میوە زۆر گرنگە بە تایبەت ئەو جۆرانەی بڕێكی زۆر ئاویان تێدایە وەك ترۆزی ، خەیار ، كاڵەك ، مزرە سێو ، شووتی ، قەیسی ، هەوڵ بدە سێ جار لە نێوان ژەمەكان بیان خوێت ، ئەگەر حەزت لە شیرینی بوو، میوەی شیرین بخۆ .
۸ ــ تا دەتوانێت بە پێ سەردانی دراوسێ وكەس و كار و هاوڕێكانت بكە ، بۆ بینینان بچۆ، نەوەك شت خواردن.
۹ ـــ زۆر گرنگە شەوی پێش جەژن زوو بخەویت و ڕۆژانی تریش دوور بكەرەوە لە شەونخوونی ، دانیشتنی زۆر بە دیار تەلەفزێون و ئینتەرنێتەوە.
۱۰ ـــ پاڵنەكەوتن دوای خواردن لانی كەم بۆ ماوەی نیو كاتژمێر ، هەوڵ بدە دوای نان خواردن نەخەویت ، ئەگەر زۆر خەوت هات پێش بانگی عەسر نیو كاتژمێر بخەوە.
۱۱ ـــ ئەگەر چوویت بۆ سەیران بۆ نان خواردن مەچۆ، بۆ گەڕان و هەڵمژینی هەوای پاك بچۆ.
۱۲ ـــ ئەو كەسانەی نەخۆشی درێژخایەنیان هەیە، پێویستە زۆر ئاگاداری خواردنی دەرمانەكانیان بن لەكاتی خۆی دا لەگەڵ پابەند بوون بە پارێزی تایبەت بە نەخۆشییەكانیان .

ئەو پزیشكە دەڵێت، تكایە وێنەی خواردن لە تۆڕە كۆمەڵایەتییەكان بڵاومەكەرەوە، چونكە كەسانێكی زۆر هەن لەم وڵاتە كەم دەرامەت و هەژارن ، هەروەها دەبێتە هاندان بۆ زۆرخۆریی.