هەرێم نیوز
وەزیری سامانە سروشتییەکان پێشوازیی لە کونسوڵی گشتیی تورکیا لە هەولێر کرد و رایگەیاند، وێڕای هەموو ئاستەنگ و بەربەستەکان، دەنگدان لەسەر هەموارکردنەوەی بودجەکە هەنگاوێکی باشە بۆ دەستپێکردنەوەی هەناردەی نەوتی هەرێم.
وەزارەتی سامانە سروشتییەکان لە راگەیەنراوێکدا بڵاویکردەوە، تێیدا هاتووە، کەمال محمد ساڵح وەزیری سامانە سروشتییەکان بە وەکالەت پێشوازیی لە ئێرمان تۆپچو کونسوڵی گشتیی تورکیا لە هەرێمی کوردستان کرد.
ئاماژەی بەوەش کردووە، وەزیری سامانە سروشتییەکان جەختی لەسەر گرنگیی هەناردەکردنەوەی نەوتی هەرێمی کوردستان و شایستە داراییەکانی کۆمپانیاکان کردەوە، کە وێڕای هەموو ئاستەنگ و بەربەستەکان، دەنگدان لەسەر هەموارکردنەوەی بودجەکە هەنگاوێکی باشە بۆ دەستپێکردنەوەی هەناردەی نەوتی هەرێم.
بەگوێرەی ڕاگەیەندراوەكە، تەوەرێکی دیکەی کۆبوونەوەکە تایبەت بوو بە کەرتی کارەبا؛ وەزیری کارەبا، بوونی کۆمپانیاکانی تورکیا و لێهاتووییان لە بونیاتنانی ژێرخانی کارەبای هەرێم بەرز نڕخاند.
ئەوەش هاتووە، کونسوڵی گشتیی تورکیا ئامادەیی کۆمپانیاکانی وڵاتەکەی بۆ وبەرهێنان و جێبەجێکردنی پڕۆژەکانی کارەبا خستەڕوو.
ئەوەش خراوەتەڕوو، جێگری سەرۆکی کونسوڵی گشتی و بەرپرسی بەشی بازرگانی و کاروباری وزە لە کونسوڵخانەی تورکیا و بریکار و و ڕاوێژکار و بەڕێوەبەرانی گشتی سامانە سروشتییەکان ئامادەی کۆبوونەوەکە ببوون.