هەرێم نیوز
سەرۆکی لیژنە هاوبەشەکانی قائیمقامیەتی پێنجوێن رایگەیاند، دوای ئەزموونی سەرکەوتووی نەهێشتنی دیاردەی فرۆشتنی ڤەیپ لە پێنجوێن، لە ئێستادا "هەڵمەتی نەهێشتنی ڤەیپ لە سەرتاسەری هەرێمی کوردستان رادەگەیەنین".
سەروەر کەریم کەریم، سەرۆکی لیژنە هاوبەشەکانی قائیمقامیەتی پێنجوێن، لە لیدوانێکیدا ڕایگەیاند" دوای هەڵمەتی نەهێشتنی ڤەیپ لە قەزای پێنجوێن و نەمانی دیاردەی ڤەیپ کێشان هەڵمەتێکی نوێ لە پێنجوێنەوە بۆ سەرتاسەری کوردستان ڕادەگەیەنین".
ئاماژەی بەوەشدا، لە پێشوتردا هەڵمەتێکی بەرفراوانمان بۆ نەهێشتنی ڤەیپ لە قەزاکە دەستپێکرد، خۆشبەختانە دوای کارێکی زۆر و هاوکاری هاووڵاتیان و بەدەنگەوە هاتنی لایەنی پەیوەندیدار لە لیژنەهاوبەشەکان و پۆلیس و قائیمقامیەتی پێنجوێن و سەرجەم لایەنەکان، توانرا هەڵمەتەکە بە سەرکەوتویی بەڕێوە ببرێت، هاوکات سەرجەم دوکاندار و هاووڵاتیانیش بەدەم هەڵمەتەکەوە هاتن و توانرا ئەو دیاردەیە لە کێشان و فرۆشتنی ڤەیپ لە پێنجوێن کۆتایی پێ بهێنرێت.
سەروەر کەریم، راشیگەیاند، " لە ئێستادا سەرقاڵی هەڵمەتێکی تری هۆشیارکردنەوە و نەهێشتنی ڤەیپ-ین لە سەرتاسەری کوردستان و کەمپینێک بەناوی هەڵمەتی نەهێشتنی ڤەیپ لە کوردستان ڕادەگەیەنین، هاوکات ئەم هەڵمەتە بە چاودێری خودی قائیمقامی پێنجوێن لەگەڵ لیژنە هاوبەشەکانی قائیمقامیەت و هاوکارانمان لە پۆلیس و پۆلیسی هاتووچۆ و لایەنە پەیوەندیدارەکان دەستپێدەکەین، و سەرەتا خوێندنگەکان ئاگادار دەکەینەوە و سەردانی مەیدانی دەکەین، بەمەبەستی گەیاندنی ئەم کەمپینە بە سەرتاسەری کوردستان".