هەرێم نیوز
شارەزای کەشناسی ڕایگەیاند، “لە ناوەڕاستی ئەم مانگە بەدواوە لە هەرێمی کوردستان پلەی گەرما لەژێر سفری سیلیزییەوە دەبێت”.

 هەڤاڵ سەدیق گەڵۆزی، شارەزای کەشناسی لە بڵاوکراوەیەکدا رایگەیاند: "پێشبینی دەکرێت لە ناوەڕاستی ئەم مانگە بەدواوە لەنێوان مەودای 18/1/2025 بۆ 22/1/2025، بارستە هەوایەکی ساردی جەمسەری زۆر بەهێز لە سیبیریاوە ڕوو لە وڵاتانی سووریا، ئوردەن، لوبنان، فەڵەستین، تورکیا، میسر، باکووری خۆرڵاتی لیبیا، تەواوی ناوچەکانی باکووری سعوودیە، باکووری کوردستان، ڕۆژهەڵاتی کوردستان، هەرێمی کوردستان و عێراق بکات کە پلەکانی گەرما دابەزینی بەرچاو بەخۆیەوە دەبینێت و لە زۆربەی ناوچەکانی هەرێمی کوردستان پلەی گەرما لەژێر سفری سیلیزییەوە دەبێت."

ئەوەشی خستەڕوو: "بەپێی پێشبینییە سەرەتاییەکانی کەشوهەوا کە ئاماژەی پێدەکەن شەپۆلێکی زۆربەهێز و چڕی بەفربارین بەشێکی زۆری ناوچە جیاجیاکانی هەرێمی کوردستان بگرێتەوە، ئەگەر شەپۆلەکە گۆڕانکاری بەسەردا نەیەت و جێگیر بێت وەکوو ئێستا بە بەهێزی بمێنێتەوە ئەوا پێشبینی دەکرێت لە 70% تا 80%ی ناوچە جیاوازەکانی هەرێمی کوردستان سپی پۆش بێ و بەفر ببارێ، هاوشێوەی بەفربارینەکەی ساڵی 2023.

باسی لەوەشکرد: "ئەگەری هەیە بارستە هەوا ساردەکە زیاتر دابەزێتە ناوچەکانی دیکەی هەرێمی کوردستان و لەسەنتەری شارە گەورەکانی هەرێمی کوردستانیش بەفر ببارێت."