هەرێم نیوز
بەڕێوەبەرایەتی ئەوقافی سلێمانی چەند بڕیارێكی سەبارەت بە بەڕێوەچوونی پرسە لە مزگەوتەكان و خێمەی بەردەم ماڵەكان دەركرد و دەڵێت، قورئان خوێنەكان پابەند بن بەو نرخەی بۆیان دیاری كراوە.
ئەمڕۆ دووشەممە، 12ی 2ی 2024، بەڕێوەبەرایەتی ئەوقافی سلێمانی لە گشتاندنێکدا دەڵێت، لەپێناو بەرژەوەندی گشتی و دروست نەبوونی بارگرانی لەسەر هاووڵاتیان لەكاتی پرسەدا، مامۆستا و خزمەتگوزاری مزگەوت دەستوەردان نەكات لەبابەتی بەكرێدانی خێمە و كورسی و قورئان خوێن بۆ پرسە.
ڕاشیگەیاندووە، هیچ بڕە پارەیەك داوا نەكرێت بۆ بەكرێدانی هۆڵی پرسە و قورئان خوێن پابەند بێت بەو نرخەی بۆی دیاریكراوە لەلایەن وەزارەتی ئەوقافەوە، كە 50 بۆ 70 هەزار دینارە.
هەر لە گشتاندنەكەدا هاتووە، “ڕێگە نەدرێت بە گێڕان و دانانی چایی و قاوە لە مزگەوتەكاندا لەكاتی دانانی پرسە، چونكە دەبێتە هۆی بارگرانی لەسەر هاووڵاتیان و خاوەن پرسە و زیادە خەرجییە”.