هەرێم نیوز
نەخۆشخانەی گشتی بالیسان لەقەزای شەقڵاوەی سنوری پارێزگای هەولێر رایگەیاند، تەرمی کەسێک کە پیشەی پێشمەرگەیە بە کوژراوی گەیەندراوەتە نەخۆشخانەکەیان و لەئێستاشدا بۆ لێکۆڵینەوەی زیاتر، تەرمەکەی رەوانەی پزیشکی دادی هەولێر کراوە.
نەخۆشخانەی گشتی بالیسان لەڕاگەیەندراوێکدا بڵاویکردەوە، "کاتژمێر 7:40 خولەکی بەیانی ئەمڕۆ، تەرمی هاوڵاتیەکی تەمەن 43 ساڵ گەیەندرایە نەخۆشخانەکەمان، دوای ئەنجامدانی شیکاری سەرەتایی دەرکەوت ئاسەواری گوللە بەجەستەیەوە دیارە".
ئاماژەی بەوەشکردوە، "بۆ لێکۆڵینەوەی وردتر لەڕێگەی تیمی نەخۆشخانەکەمانەوە تەرمەکە ڕەوانە پزیشکی دادی لەشاری هەولێر کرا، لەئێستاشدا پۆلیس پەڕاوی لێکۆلینەوەی بۆ ڕوداوەکە کردۆتەوە".
بەگوێرەی زانیاریەکان، ئەو کەسەی کە بەیانی ئەمڕۆ تەرمەکەی رەوانەی نەخۆشخانەی گشتی ناحیەی بالیسان کراوە، ناوی سەدرەدین محەمەدە، پلەی موقەدەمە لە هێزی پێشمەرگەی کوردستان، باوکی چوار منداڵە، کە گەورەکەیان لە تەمەنی 13 ساڵیدایە.
تاوەكو ئێستا دەزگا ئەمنیەكانی هەولێر، هیچ رونكردنەوە و زانیاریەكیان لەبارەی ئەو روداوە نەخستۆتەڕو.