هەرێم نیوز

قایمقامی قەزای ناوەندی هەولێر رایگەیاند، هەر بازرگانێک نرخی کاڵا و کەلوپەل بەشێوەکی نائاسایی بەرز بکاتەوە سزا دەدرێت، دەشڵێت، لە ماوەی رابردوودا، نرخی گۆشتی سوور بەڕێژەکی بەرچاو بەرز ببوەوە،کە لە درێژەی هەوڵەکانی بەڕێوبەری چاودێری بازرگانی هەولێر و لیژنەی قایمقامیەت نرخەکە جێگیر کرا.

ئەمڕۆ چوارشەممە، نەبەز عەبدولحەمید قایمقامی قەزای ناوەندی هەولێر، کۆنفڕانسێکی رۆژنامەوانیدا رایگەیاند، هەر بازرگانێک بەشێوەکی نائاسایی و بەدەر لە ڕێنامییەکان نرخ بەرز بکاتەوە، سزا دەدرێت و لەئەگەری دووبارەکردنەوەیدا راپێچی دادگا دەکرێت، هەروەها بەهۆی بەرزبوونەوەی نرخی دۆلار تا راددەیەک نرخی کاڵا و کەلوپەلەکان بەرز بوونەتەوە، کە ئەمەش لە دەسەڵاتی کەسدا نەبووە.

باسی لەوەش کرد، لە ئێستادا نرخی دۆلار بەرەو دابەزین دەڕوا، ئەمەش وادەکات نرخی شتوومەکیش لە بازاڕەکان دابەزێت، هەروەها حکومەت کارئاسانی بۆ بازرگانان دەکات بۆ هێنانی خۆراکی زۆر و دروستبوونی کێبڕکی لەنێوانیان ئەمەش وادەکات نرخ زیاتر دابەزێت.

قایمقامی قەزای ناوەندی هەولێر وتیشی، لە ماوەی رابردوودا، نرخی گۆشتی سوور بەڕێژەکی بەرچاو بەرز ببوەوە، هەروەها لە درێژەی هەوڵەکانی بەڕێوبەری چاودێری بازرگانی هەولێر و لیژنەی قایمقامیەت نرخەکە جێگیر کرا.

سەبارەت بە نرخی گۆشتی مریشکیش وتی، نرخی گۆشتی مریشک بەو نزیکانە دادەبەزێت، ئێمە رەچاوی داواکارییەکانی هاووڵاتییان دەکەین، هەروەها کار ئاسانکاری تەواویش دەکەین بۆ خاوەن کێڵگە پەلەوەریەکان تاکو ئەوانیش باشترین جۆری پەلەوەر رەوانەی بازاڕ بکەن و پێویستی بازاڕی پێپڕبکەونەوە".

نەبەز عەبدولحەمید، تایبەت بە نرخی مۆلیدە ئەهلییەکان ئاماژەی بەوە کرد، "بەهۆی دابەزینی نرخی گازوایل، ئێستا نرخی ئەمپێری موەلیدەکانیش کەم بووەتەوە، داوا لە هاووڵاتییان دەکەین لە ئەگەری بێزاربوونیان لە دەنگی بەرزی موەلیدە و دووکەڵی رەشی، لیژنەی چاودێری موەلیدە ئەهلییەکان ئاگەداربکەنەوە، تاوەکو داواکاریەکانیان بەهەند وەربگیرێت و چارەسەربکرێت".

قایمقامی قەزای ناوەندی هەولێر، ئەوەشی خستەڕوو، لەم نزیکانە رێنمایی تایبەت بە جەژن بڵاودەکرێتەوە،و لە رۆژانی جەژندا مارکێت و نانەوخانەکان کراوە دەبن، هەروەها هۆتێلەکان پێشوازی لە گەشتیاران دەکەن، نەخۆشخانە و دەرمانخانەکانیش کراوە دەبن بۆ پێشوازی نەخۆش.