دواین هەواڵ

کوردستان‌

 5 رۆژ پێش ئێستا

پارەی پێویست بۆ تەواو کردنی پڕۆژەی 100 مەتری سلێمانی تەرخاندەکرێت

هەرێم نیوز

وەزیری شارەوانی لە میانی سەردانی مەیدانی بۆ سەر پرۆژەی شەقامی سەد مەتریی سلێمانی رایگەیاند، پرۆژەی 100 مەتریی سلێمانی جێی بایەخی سەرۆكی حكوومەتە و 50%ی كارەكانی تەواو كراوە و 83%ی داهاتی فەرمانگەكانیشی بۆ تەرخان دەكرێت.

وەزارەتی شارەوانی و گەشتوگوزاری هەرێم لە راگەیەنراوێکدا بڵاویکردەوە، ئەمڕۆ پێنجشەممە 23ی حوزەیرانی 2022، ساسان عەونی، وەزیری شارەوانی و گەشتوگوزار بە یاوەری شاندێكی وەزارەت كە پێكهاتبوون لە ڕاوێژكار و بەڕێوەبەرانی گشتیی ئاو و ئاوەڕۆ، دیوان، نەخشەدانانی ئاوەدانی، پلان و بەدواداچوون، پرۆژەكان و ژمارەیەك بەڕێوەبەری دیكەی ناو وەزارەت سەردانی شاری سلێمانی كرد و دواتر پرۆژەی 100 مەتریی سلێمانی بەسەركردەوە.

باس لەوەش کراوە، وەزیری شارەوانی و گەشتوگوزار بە یاوەری پارێزگاری سلێمانی بۆ لەنزیكەوە ئاگاداربوون لە چۆنیەتی بەڕێوەچوونی كارەكانی پرۆژەی شەقامی 100 مەتریی سلێمانی، سەردانی پرۆژەكە دەكات و لەبارەی تەرخانكردنی بودجەش، ڕایدەگەیەنێت شەقامی 100 مەتریی سلێمانی جێی بایەخی سەرۆكی حكوومەتە و 83%ی داهاتی فەرمانگەكان بۆ ئەو پرۆژەیە تەرخان دەكرێت.

لە كۆنگرەیەكی ڕۆژنامەوانیدا لەسەر پرۆژەی شەقامی 100 مەتریی سلێمانی، ساسان عەونی، وەزیری شارەوانی و گەشتوگوزار وتی، لەمیانەی سەردانەكەماندا بۆ شاری سلێمانی، بە پێویستمانزانی لە نزیكەوە سەردانی پرۆژەی شاڕێی بابان، شەقامی 100 مەتریی سلێمانی بكەین بۆ ئەوەی لە نزیكەوە لەگەڵ لایەنی بەرپرس و فەرمانگەی ئەندازیاری نیشتەجێ و كۆمپانیای قەیوان لە هەنگاوەكانی جێبەجێكردن و بەرەوپێشچوونی ئەو پرۆژەیە بكۆڵینەوە و ئاگاداری بین. گوتیشی: ئەوەی جێی خۆشحاڵییە پرۆژەكە 50%ی كارەكانی جێبەجێ بووە و كاری خۆڵكاری و تێكەڵەكردن، بەشی زۆری تەواو بووە و هەوڵ دەدرێت قۆناغەكانی داهاتووش لە كاتی دیاریكراوی خۆیدا تەواو ببن".

وەزیری شارەوانی وتیشی، ئەوە دەرفەتێكی زۆر باشە وەكوو وەزارەتی شارەوانی و گەشتوگوزار و پارێزگای سلێمانی و سەرۆكایەتیی سلێمانی لە نزیكەوە پرۆژەیەكی ستراتیژی گەورە بەسەر دەكەینەوە، لێرەدا دووپات لە سیاسەتی حكوومەتی هەرێمی كوردستان دەكەینەوە كە دەخوازین هەموو پرۆژە گەورە و ستراتیژییەكان لەلایەن وەبەرهێنەران و سەرمایە و دەستیكاری خۆماڵی جێبەجێ بكرێن. گوتیشی: هیوادارین لە ئاییندەیەكی نزیكدا تەواوكردنی ئەم پرۆژە گرنگ و كوردستانییە بۆ شاری سلێمانی بە تەواوكراوی ببینین و حكوومەتی هەرێمی كوردستانیش هەموو پشتیوانی و پشتگیری و كارئاسانییەك پێشكەش دەكات.

ساسان عەونی ئاماژەی بەوەش کردووە، پرۆژەی 100 مەتری سلێمانی جێی بایەخی ئەنجوومەنی وەزیران و جەنابی سەرۆكی حكوومەتە و دوا بڕیاریش كە لە ئەنجوومەنی وەزیران دەرچووە، 83% داهاتی فەرمانگەكان بۆ ئەو پرۆژەیە تەرخان دەكرێت و پارەی پێویستی بۆ دابین دەكرێت، هەر بودجەیەكیش پێویست بێت بۆ تەواوكردنی بە دڵنیاییەوە حكوومەتی هەرێمی كوردستان درێغی ناكات.



Copyright © 2020 All Rights Reserved Designed And Developed By AVESTA GROUP