ئەو دۆخە داراییەی ئێستا لە بازاڕەکانی هەرێمی کوردستاندا دەبینرێت، گوزارشت لە جۆرە فەوزایەکی ئابووری دەکات کە تێیدا بڕێکی یەکجار زۆری دراوی نەقد لە دەرەوەی سیستەمی بانکی و دامەزراوەیی دەوران دەکات. ئەمەش وایکردووە بازاڕ ببێتە گۆڕەپانێکی کراوە بۆ مامەڵەی پڕکێشە و ناڕوون. کاتێک دەبیستین کەسێک یان نووسینگەیەک بە هەزاران دەفتەر دۆلارەوە ئیفلاسی کردووە، ئەمە تەنها شکستی تاکەکەسێک نییە، بەڵکو نیشانەیەکی ڕوونی نەبوونی کەناڵی متمانەپێکراوی وەبەرهێنانە. هاوڵاتیان بەهۆی نەبوونی بەدیلێکی یاسایی، پەنا دەبەنە بەر مامەڵەی مەترسیداری وەک دراوە ئەلکترۆنییە ناڕێکخراوەکان، کڕین و فرۆشتنی کارتی مۆبایل بە قیست، یان بازاڕی عەقارات و ئۆتۆمبێلی بێسەروبەر، کە هەموو ئەمانە دەبنە هۆی هەڵئاوسانی دەستکرد و دواتر تەقینەوەی ئەو بڵقە داراییانە و لەدەستچوونی متمانەی گشتی.

بۆ ڕێگریکردن لەم تێكچوونە کۆمەڵایەتی و ئابوورییە، پێویستە ستراتیژییەتێکی نوێ پەیڕەو بکرێت کە بریتییە لە دامەزراندنی کۆمپانیا پشکدارییە گەورەکان لە سێکتەرە جیاوازەکاندا؛ بە جۆرێک ئەم کۆمپانیایانە ببنە دەفرێکی گەورە بۆ کۆکردنەوەی ئەو سەرمایە پەرتەوازانەی لە ماڵەکان و بازاڕە میلییەکاندا کەوتوون. ئەم مۆدێلە، هاوڵاتی لە نێچیرێکی ئەگەریی فێڵە داراییەکانەوە دەگۆڕێت بۆ خاوەن پشکێکی یاسایی لە پڕۆژە ستراتیژییەکاندا. کاتێک هاوڵاتی دەبێتە شەريك لە کۆمپانیایەکی پیشەسازی، کشتوکاڵی، یان نیشتەجێبوون، ئەو پارەیەی پێشتر لە مەترسیدا بوو، دەبێتە بەشێک لە ژێرخانی وڵات و دەکەوێتە ژێر چاودێری وردی یاسایی و وردبینی دارایی، ئەمەش نەک هەر ڕێگری لە ئیفلاسبوونی گوماناوی دەگرێت، بەڵکو دەبێتە هۆی ئەوەی سەرمایەی نیشتمانی لە ناوخۆدا گەشە بکات.

سوودەکانی ئەم هەنگاوە تەنها بۆ هاوڵاتیان نییە، بەڵکو حکومەت وەک لایەنی ڕێکخەر دەبێتە خاوەنی بازاڕێکی شەفاف کە تێیدا سووڕی دراو ئاشکرایە. لە ڕێگەی کۆمپانیا پشکدارییەکانەوە، حکومەت دەتوانێت بە ئاسانی باجی دادپەروەرانە کۆبکاتەوە و هەلی کار بۆ هەزاران گەنج بڕەخسێنێت، بەبێ ئەوەی کەرتی گشتی بارگاوی بکات بە دامەزراندنی زیادە. جگە لەوەش، ئەم کۆمپانیایانە کەرتی بانکی کارا دەکەن، چونکە مامەڵەی ملیۆنان دۆلار دەچێتە ناو بانکەکان و ئەمەش وایان لێ دەکات بتوانن قەرز و ئاسانکاری بۆ پڕۆژەی تر دابین بکەن. ئەمە سیستەمێکە کە تێیدا هەموو لایەک قازانج دەکەن و مەترسیی هەرەسی دارایی بۆ نزمترین ئاست دادەبەزێت.
لەلایەکی دیکەوە، پەرەپێدانی فەرهەنگی پشکداری دەبێتە هۆی ئەنجامدانی پڕۆژە مەزنەکان کە وەبەرهێنەری تاکەکەس توانای جێبەجێکردنیان نییە؛ وەک کارگەی گەورەی بەرهەمهێنان و وێستگەکانی وزە. بەم شێوەیە، ئەو پارەیەی پێشتر وەک ژمارەیەکی وەهمی لە مامەڵە ناڕاستەکاندا دەورانیکردووە، دەگۆڕێت بۆ کارگە و بنیادنانی ڕاستەقینە. ئەمە ئاسایشی ئابووری هەرێم بەهێزتر دەکات و دەبێتە بەربەستێکی پۆڵاین لەبەردەم شڵەژانە داراییەکانی داهاتوو.

لە کۆتاییدا، گۆڕینی بازاڕی کوردستان لە بازاڕێکی تاکەکەسییەوە بۆ بازاڕێکی دامەزراوەیی، تەنها پێویستی بە ئیرادەی یاسایی و هۆشیاری دارایی هەیە. کاتێک یاسا پارێزگاری لە مافی بچووکترین پشکدار دەکات، متمانە دەگەڕێتەوە بۆ بازاڕ و ئەو سەرمایە زەبەلاحەی ئێستا پەرتەوازەیە، دەبێتە بزوێنەری سەرەکی ئابووری کوردستان. ئەمە ڕێگەیەکە کە تێیدا هاوڵاتی دەبێتە شەريكی ڕاستەقینەی ئاوەدانکردنەوە و چیتر ترسی ئەوەی نابێت لە شەو و ڕۆژێکدا داراییەکەی بەهۆی فێڵێکی بازاڕی سێبەرەوە لەدەست بدات.