بەهەڵدانەوەى لاپەرەکانى مێژوویی رابردوو  و بە ئێستاشەوە ،هەموو ڕژێم و سیستەمە حکوومڕانەکانى عێراق بە یەک ئاڕاستە و بەهەموو توانایەکەوە هەوڵى سڕینەوە و ڕێشەکێشکردنى مۆڕکى نەتەوایەتى کوردوکوردستانیاندا ، ئەو هەوڵانە لەکاتێکدا بووە هەر کاتێک هەر ڕژێمێکى عێراق هەستى بەلاوازى و بێ هێزى کرد بێت ، ئەوا گەلى کورد و سەرکردایەتییە سیاسییەکەى پشتیوانى بووە تا خۆى بەهێز بکاتەوە و بکەوێتەوە سەر پێیەکانى بەڵام دواتر بە ئاگر و ئاسن و کوشتن و بۆمب و گەلەکۆمەکى وەڵامى کوردیان داوەتەوە تا دەگاتە ئەمڕۆ حکوومڕانى عێراقى نوێى فیدراڵیی و دیموکراسى ئەم جۆرە سیستەمەش بەهەمان شێوە کاتێک بێ هێز و بێ توانا دەبێت داواى پێکهێنانى حکوومەت و پشتیوانیکردن لە سەرکردایەتیی سیاسى گەلى کورد  دەکەن ، بەڵام ئەمانەش بەهەمان شێوەى ڕژێمەکانى پێش خۆیان بێ وەفا و  بێ ئەمەک دەرچوون بە شێوەیەک لە جیاتى پابەند بوون بە بنەماکانى هاوبەشى و جێبەجێکردنى دەستوور و برگەکانى تایبەت بە گەلى کورد و هەرێمى کوردستان وەک قەوارەیەکى یاسایی و دەستوورى ، نەک لە هەموو بەڵێنەکانیان پاشگەز دەبنەوە بەڵکو بە زمانى درۆن و ئاگر و گەمارۆدان و جۆرها قەیرانسازى وسیناریۆ سازى پەلامارى گەلى کورد و قەوارەى کوردستان دەدەن 
ئەوەى لەم چەند ساڵەى دواییدا لە حکوومەتەکانى عێراق بەرامبەر بە کوردستان بینراوە و ئەو زێهنیەتە فاشیزمەیە کە بە شێوەیەکى نەخشە دارێژراو و سیستماتێک کاریان بۆ ئەوە کردووە تا هەرێمى کوردستان لە هەموو ڕوویەکەوە تووشى لاواز بوون بکەنەوە و سەنگ وپێگەى سست بکەن و پرسێک بەناوى قەوارەى فیدڕراڵى و حکوومەتى کوردستان نەهێڵن . لە کاتێکدا عێراق لەناوخۆدا تووشى هەرەسهێنان و داڕمانى زۆر بووەتەوە و شتێک بەناوى سەروەرى نەماوە لەهەموو ڕوویەکەوە بەدەست دەستوەردانى دەرەکى و بوونى دەیان گروپى ملیشیایی کە ژەمارەیان دەگاتە نزیکەى 300 هەزار چەکدارە دەناڵنێت ، جگە لە تاڵانکارى سەروەت و سامان و دەستبەسەرداگرتنى بری نەوت و خاڵە گومرکییەکان و هتد..
بەڵام خۆڕاگرى گەلى کورد و حکوومەتى کوردستان لەماوەى رابردوو و بە ئێستاشەوە لە ژیر ئەو فشارە قورسانەى فاشیزمەکانى عێراقەوە ، ئاماژەن بە بەهێزى ئیرادەى گەلى کورد لە پێناو ئایندەیەکى گەشتر . ناگرێت ئەم ئیرادەیە سست و لاواز بکرێت ، بەدڵنیاییەوە ، گۆڕانکارییەکانى ناوچە و عێراق خێران و ئەم جۆرە یارییە سیاسییە قێزەوەنەى عێراق و میلیشیاکانیان پێچەوانەى ویستى وڵاتانى زڵهێز و کۆمەڵگەى نێودەوڵەتییە و کۆتایی پێدەهێنریت . رووداوەکان بە خێرایی تێدەپەڕن و نەخشە وپیلان و فشارەکانى عێراق بۆ گۆشەگیرکردن و خۆرادەستکردنى کوردستان بەردوامە بۆ تێوگەڵانى لە ململانێ و ئاڵۆزییەکانى ناوچەکە و یانیش سیناریۆیەکى هاوشێوەى 16ى ئۆکتۆبەرى 2017 بەڕێگەى ئاژاوەنانەوە و کێشەى ناوخۆیی ، بۆیە زۆر گرنگە خۆڕاگر بین ، چونکە ڕێرەوى سیاسى ناوچەکە لە گۆڕانکاریی تەواو دایە و ئەوانەى دەستیان پێکردووە و هەر ئەوانیش دەیگۆڕن و زۆر گرنگە گەلى کورد بەم شێوەیە هاوسەنگییەکان بپارێزێت و مامەڵەى ژیرانە بکات و نەکەوێتە داوى دوژمنان و نەیارانى کوردستانەوە 
بەتایبەتى ئێران کەوتۆتە پەلەقازە و هەموو هەوڵێک دەدات بۆ مانەوە بەرگریکردن لە پێگەى خۆى و ئینجا کۆتا جەبهەى لە عێراقدا . بەڵام پێناچێت بتوانێت لە نەخشە و بەرنامەیەدا سەرکەوتوو بێت چونکە گۆڕانکارى و شەڕى نوێى لە رۆژهەڵاتى ناوەڕاست لە ئارادیە و کۆمەڵگەى نێودەوڵەتى ئێران بە گەورەترین هەڕەشە بۆ سەر سەقامگیرى ناوچەکە دەبینن .
لەدواى شەڕى 12 رۆژەى ئێران و ئیسرائیل ، تاران بەردەوام خەرێکى کڕینى چەک و خۆئامادەکردنە بۆ شەڕێکى نوێى و لەگەڵ ئەوەى باش دەزانێت چارەنووسى بەرەو کوێیە . عێراقى فاشیزیمش لە ژێر فشارى ئاغاکانى لە ئێران ، سیاسى بەکارهێنانى جاش مورتەزەقە و چەکى برسیکردن و شەڕى راگەیاندن و ئابوورى و سیخوریکردن و تابوورى پێنجەمى بەرامبەر بە گەلى کوردستان و حکوومەتى کوردستان گڕتۆتەبەر بەشێوەیەکى پیلان و نەخشەدارێژراو لە ژێر فەرمانى دەرەکى ، بەتایبەت جاش کۆیڵەکان لە یەک کاتدا بەسازى ئاغاکانیان بۆ دژایەتیکردنى قەوارەى کوردستان سەما دەکەن و هەموو هەوڵێک دەدەن تا عێراق بە چەکى مووچە و بودجە ئیرادەى خەڵکى کوردستان بشکێنێت و بەردەوام خەریکى ئاژاوە نانەوە و دروستکردنى دووبەرەکی و نۆکەرایەتى دوژمنانى کوردستانن ، چونکە باش دەزانن چارەنووسى ڕەشى ئەو جاش کۆیلانەش لەگەڵ داگیرکەرانە و هیچ داهاتوویەکیان نابێ جگە لە چوونە ناو زبڵدانى مێژوویی پڕ لە ریسوایی نەبێت .
ئێستا وڵاتانى داگیرکەرى کوردستان بۆ پرسى دژایەتیکردنى گەلى کورد ، وێراى ئەوەى لە زۆر رووە ناکۆک و نەیارى یەکترن ، بەڵام  هەموویان بە یەک ئاڕاستە هێرش و گەمارۆ و پەڵاماردانەکانیان دژى هەرێمى کوردستان چڕکردۆتەوە بەتایبەتى ئێران کە سەرسەختترین دوژمنى کوردوکوردستانە و لەماوەى رابردوو و بە ئێستاشەوە هەموو هەنگاو و سیناریۆ پیلانگێرییەکانى بۆ ئەوە بووە تا هەرێمى کوردستان بەرەو پێشەوە نەڕوات و گەشە بەخۆیەوە نەبینێت ، بۆیە ، ڕووخانى ڕژێمى ئێران ، واتا کرانەوەى گڕێکوێرەکان و گەڕانەوەى ماف و خاک  بۆ نەتەوەیی کورد ، بەدڵنییاییەوە ، گۆڕانکارى نەخشەى رۆژهەڵاتى ناوەڕاست دەرفەتێکى باش لە بەرژوەندى گەلى کورد دێنێتە پێشەوە و سەنگ وپێگەى کوردوکوردستان بەهێزتر و زیاتر بەرەو پێشەوە دەچێت و دوژمنان و کۆیلەکانیش جگە لە پووکانەوە هیچ داهاتوویەکیان نەماوە