لە هیچ شوێنێكی دونیادا نەبووە، تەنانەت ئەو وڵاتانەی لە ترۆپكی دیموكراتیشن، كە لەكاتی تەنگانە و قەیرانیی سیاسیدا، كە دەستی دەرەكی لەپشت بێت، كەسانێك هەبن یان میدیایەك هەبێت پشتگیری لە داگیركار، یان نەیار بكات، ئەمە تەنیا لەباشوور هەیە.
ناكرێت بەشێوەیەكی ناعەدالەتی و عەقڵییەتێكی شۆڤێنی، مووچەی زیاتر لە یەك ملیۆن كەس رابگیرێت، كەچی كەسانێك هەبن، پشتگیری لە عێراق بكەن، یان لە میدیای عێراقەوە دژی هەرێمی كوردستان قسە بكەن، كە لە چەند رۆژی رابردوو ئەمەمان بینی.
هەندێك میدیا یان پەیج و سایت، بەئاشكرا حكوومەتی هەرێمی كوردستان تۆمەتبار دەكەن، بەوەی حەقی عێراقە مووچە نانێرێت، یان عێراقیان كردووە بە سوید و هەرێمی كوردستانیشیان كردووە بە ئەفغانستان، ئەمە نابێت تێپەڕێت و كارەساتی بەدوا دێت، یاخود ئەمە ئازادی بیروڕا نییە، ئەمە بەڕەڵاییە.
ئەوكاتەی توركیا فڕۆكەیەكی جەنگی رووسیای لە سووریا خستە خوارەوە، حكوومەتی ئەوكات هەموو میدیای توركیای ئاگادار كردەوە بە ئۆپۆزسیۆنیشەوە، كە دەبێت لە بەرژەوەندی وڵات بنووسن و قسە بكەن، كەس نەیوێرا بڕیارەكە جێبەجێ نەكات، چونكە بۆ بەرژەوەندی وڵات بوو. یەكەم بەخیانەتكردنی دەمیرتاشیش ئەوكات دەستیپێكرد، كە لەوساتەدا چووە رووسیا و لەگەڵ لاڤرۆڤ كۆبوونەوەی كرد، هەموو میدیاكانی توركیا بە خاین ناویان برد.
دەبێت لەلایەن حكوومەتەوە، بڕیار و بەیاننامە بۆ هەموو میدیایەك بنێردرێت، كە نابێت لەم كاتە هەستیارەدا پشتی نەیار بگرن، دەبێت لەبەرەی گەل بن، گەرنا پێویستە میدیاكان لێپرسینەوەیان لەگەڵدا بكرێت.
بەداخەوە، كەناڵێكی تەلەڤزیۆنی باشوور، هەندێك پەرلەمانتاری كردووە بەپاڵەوان و لەم كاتەدا دێن باس لە گەندەڵی حكوومەت دەكەن و پاساو بۆ عێراق دەهێننەوە لەبەرامبەر نەناردنی مووچە، ئەمە كارەساتە و هەستی نیشتیمانی لاواز دەكات، گرنگە بەپەلە رێگە لەو جۆرە كارانە بگیرێت. باسكردن لەگەندەڵی، ئاساییە و گرنگە، بەڵام لەم كاتەدا تەنیا خزمەتە بە داگیركار.
با نموونەكە گشتگیرتر بكەم، لە كاتی هاتنی ڤایرۆسی كۆڕۆنادا، لە هەموو دونیا ئۆپۆزسیۆن بێدەنگ بوو، حكوومەتیش بێدەنگ بوو، قسە تەنیا بۆ ئەو كەسانە بوو كە پزیشكن و شارەزای بوارەكەن، چونكە ئەوان دەیانتوانی خزمەت بە میللەت بكەن و رێنیشاندەریان بن تا لەو بەڵایە خۆیان بپارێزن، لە باشووری كوردستان پێچەوانە بوو، ئەمەشیان بە سیاسی كرد، تەنەنات سەركردەیەكی پارتێكی سیاسی گوتیان، حكوومەت درۆ دەكات كۆڕۆنا بوونی نییە و كێ حەزی لێیە ناو دەمی ماچ دەكەم و كۆڕۆنا ناگرم.
ئێستاش دەبێت، تەنیا ئەو كەسانە قسە بكەن، كە ئابووریی ناسن و لە دارایی شارەزان، ئەمە خزمەتە بە گەل، ئاخر ئەوان دەزانن لەكوێدا رەخنە لە عێراق و ئەو نووسراوە شۆڤێنییە بگرن كە دژی مووچەخۆرانی هەرێم دەرچووە، نازانم بۆچی هەموو بوون بە ئابووریناس؟
هیوادرم لە كۆبوونەوەی بەیانی، كە جەنابی سەرۆك لەگەڵ هەموو پارتە سیاسییەكان ئەنجامی دەدات، ئەم بابەتە بەهەند وەربگرن.