هەرێم نیوز
بەڕێوەبەری نووسینگەی ڕاگەیاندنی سەرۆکی ئەنجوومەنی وەزیرانی عێراق ئاشکرای کرد، لێکنزیکبوونەوە و لێکتێگەیشتنی بەرهەمداری نێوان سەرۆکوەزیرانی فیدراڵ و سەرۆکی حکوومەتی هەرێمی کوردستان لەسەر پێنج دۆسیەی سەرەکی، بووەتە هۆی دواخستنی پەسەندکردنی پڕۆژەیاسای بودجە بۆ ڕۆژی شەممەی داهاتوو.
لێکتێگەیشتنی بەغدا و هەولێر لەسەر پێنج دۆسیەی سەرەکی
ئەمڕۆ سێشەممە، ١٠ی تشرینی دووەمی ٢٠٢٦، عەبدولزەهرە هنداوی، بەڕێوەبەری نووسینگەی ڕاگەیاندنی سەرۆکی ئەنجوومەنی وەزیرانی عێراق لە لێدوانێکدا بۆ ڕۆژنامەی فەرمیی عێراق ڕایگەیاند، لێکنزیکبوونەوەی نێوان بەغدا و هەرێمی کوردستان بووەتە هۆی هاتنەکایەی لێکتێگەیشتنی بەرهەمدار لەسەر پێنج دۆسیەی سەرەکی کە لەمێژە تەوەری گفتوگۆی وردی نێوان هەردوولا بوون.
هنداوی ئاماژەی بەوەش دا، ئەم پێشکەوتنە بووەتە هۆی ئەوەی ئەنجوومەنی وەزیران کاتی تاوتوێکردن و پەسەندکردنی پڕۆژەیاسای بودجە دوا بخات بۆ ڕۆژی شەممەی داهاتوو، لە کاتێکدا پێشتر ڕۆژی سێشەممە بۆ دەنگدان و پەسەندکردنی لە ئەنجوومەنی وەزیراندا دیاری کرابوو.
تەوەرە سەرەکییەکانی گفتوگۆکانی زەیدی و مەسرور بارزانی
بەپێی زانیارییەکانی ڕۆژنامەی فەرمی، گفتوگۆکانی نێوان سەرۆکوەزیران عەلی زەیدی و مەسرور بارزانی تیشکیان خستووەتە سەر پێنج تەوەری سەرەکی، کە بریتی بوون لە:
• بەڕێوەبردنی کێڵگە نەوتییەکان: بەڕێوەبردنی کێڵگە نەوتییەکان بەپێی چوارچێوە دەستوورییەکان.
•ڕێکخستنی داهاتەکان: ڕێکخستنی داهاتە نەوتی و نانەوتییەکان بە هەماهەنگیی ڕاستەوخۆی نێوان وەزارەتی داراییی فیدراڵ و وەزارەتی داراییی هەرێمی کوردستان.
• مووچەی فەرمانبەران: مسۆگەرکردنی دابەشکردنی مووچەی فەرمانبەرانی هەرێمی کوردستان هاوشێوەی تەواوی پارێزگاکانی دیکەی عێراق.
• پشکی هەرێم لە بودجە: دانانی بنەمایەکی ئارام و جێگیر بۆ پشکی هەرێمی کوردستان لە بودجەی ساڵی ٢٠٢٧.
• یاسای نەوت و غاز: پەلەکردن لە پەسەندکردن و دەربڕینی یاسای نەوت و غازی فیدراڵی.