هەرێم نیوز

گەرووی هورمز بە شێوەیەکی پلەبەندی دەست بە گەڕاندنەوەی تەوژمی هەناردەکردنی نەوت دەکات، ئەمەش هاوکاتە لەگەڵ لاوازبوونی توانای کۆماری ئیسلامیی ئێران لە بەکارهێنانی کارتی داخستنی گەرووەکە وەک ئامرازێکی گوشار لە دانوستانە ناوچەییەکاندا.

بەپێی داتاکانی بانکی «جی پی مۆرگان» (JPMorgan)، کۆی هەناردەی نەوتی خاوی ڕۆژهەڵاتی ناوەڕاست بەرزبووەتەوە بۆ زیاتر لە ١٧.٥ ملیۆن بەرمیلی ڕۆژانە (بەپێی تێکڕای ١٠ ڕۆژ)، کە ئەمەش هاوتای نزیکەی ٩٨٪ـی ئاستی پێش دەستپێکردنی گرژی و جەنگەکانە.

لەم نێوەندەشدا، بڕی نەوتی تێپەڕبوو بە نێو گەرووی هورمزدا گەیشتووەتە نزیکەی ١٣ ملیۆن بەرمیلی ڕۆژانە، کە نزیکترین ئاستە لە بەرزترین ڕێژەی تۆمارکراو لە دوای هەڵگیرسانی ئاڵۆزییەکان.

لە بەرامبەردا، هەناردەی بەرهەمە پاڵێوراوەکانی نەوت گەیشتووەتە نزیکەی ٣ ملیۆن بەرمیل لە ڕۆژێکدا، کە دەکاتە نزیکەی ٥٨٪ـی ئاستی پێش جەنگ. ڕۆژنامەی «وۆڵ ستریت جۆرناڵ» ئاماژەی بەوە کردووە کە توانای تاران بۆ پەکخستنی هاتوچۆی دەریاوانی لە گەرووی هورمز بە تەواوی پاشەکشەی کردووە، لە کاتێکدا ئەو کارتە سەرەکیترین چەکی سیاسی و ئابووریی ئێران بوو بۆ دانانی گوشار.

لە هەمان کاتدا، فەرماندەیی ناوەندیی هێزەکانی ئەمریکا (سێنتکۆم) ڕایگەیاند کە هێزەکانی لە ماوەی دوو مانگی ڕابردوودا ڕۆڵی سەرەکییان هەبووە لە دابینکردنی ڕێڕەوی ئارام و دەربازکردنی نزیکەی یەک ملیار بەرمیل نەوت بە سەلامەتی بە نێو گەرووی هورمزدا، کە ئەمەش شکستێکی ئاشکرایە بۆ هەوڵەکانی گەمارۆدانی دەریاوانی لەلایەن تارانەوە.