ھەرێم نیوز

لە هەنگاوێکی دەگمەن و دەرچوون لە پرۆتۆکۆڵی فەرمی کە ئاستی گرنگیی سەردانەکە نیشان دەدات، دۆناڵد تڕەمپ، سەرۆکی ویلایەتە یەکگرتووەکانی ئەمریکا بە شێوەیەکی ڕاستەوخۆ و کەسی لە بنکەی ئاسمانیی ئەندرۆز پێشوازی لە شی جین پینگ، هاوتا چینییەکەی کرد.

ڕۆژنامەی ئیندیپێندنت لە شیکارییەکدا ئاماژەی بەوە کردووە کە ئەم هەنگاوە ڕەنگدانەوەی گۆڕانی بەرچاوی پێگەی چینە لەسەر ئاستی نێودەوڵەتی، بەراورد بە دەیەی ڕابردوو کاتێک سەرۆکی چین لە چاوەڕوانیی دەرفەتێکدا بوو بۆ چاوپێکەوتن لەگەڵ باراک ئۆباما.

بەپێی شیکارییە نێودەوڵەتییەکان، چین ئەمجارە لە پێگەیەکی زۆر بەهێزترەوە هاتووەتە سەر مێزی دانوستان، ئەوەش تا ڕادەیەکی زۆر دەگەڕێتەوە بۆ گیرۆدەبوونی واشنتن بە شەڕی ڕۆژهەڵاتی ناوەڕاست دژی ئێران؛ جەنگێکی تێچووبەرز کە زیانی دارایی قورسی بە گیرفانی ئەمریکییەکان گەیاندووە و ئاستی جەماوەریی تڕەمپی پێش هەڵبژاردنەکانی نیوەی خول بۆ نزمترین ئاستی مێژوویی دابەزاندووە.

سەرەڕای ئەوەی کۆشکی سپی هیوای خواستبوو پەکین توانای تایبەتی خۆی بەکاربهێنێت بۆ گوشارخستنەسەر تاران بە مەبەستی کۆتاییهێنان بە جەنگ، بەڵام شی جین پینگ هیچ مەیلی پێشکەشکردنی سازشێکی لەو جۆرەی پیشان نەداوە، لە کاتێکدا لێکۆڵەرانی ستراتیژی دەڵێن واشنتن بە تەواوی دوودڵە لە گرتنەبەری هەر هەنگاوێک کە توڕەیی چینی لێبکەوێتەوە.

لە ڕوانگەی ئابووری و تەکنەلۆژیاشەوە، ڕۆژنامەی گاردیان تیشکی خستووەتە سەر ئەوەی کە تەوەری سەرەکیی گفتوگۆکان درێژکردنەوەی ئەو ئاگربەستە بازرگانییە دەبێت کە ساڵی ڕابردوو ئابووریی جیهانی لە شۆکێکی گەورە پاراست، لە پاڵ گەیشتن بە لێکتێگەیشتنێکی سنووردار لەسەر پرسی ڕێکخستنی ژیریی دەستکرد (AI).

چین کە توانیویەتی سازشێکی گەورە لە تڕەمپ وەربگرێت لە ڕێگەی ڕاگرتنی فرۆشتنی چەک بە تایوان، هەناردەکردنی بە شێوەیەکی بەرچاو هەڵکشاوە و بەرەو تۆمارکردنی زیادەی بازرگانیی ترلیۆن دۆلاری هەنگاو دەنێت؛ ئەمەش وایکردووە پەکین بەبێ هیچ پەلەکردنێک بۆ سازشکردن، دانوستان لەسەر پاراستنی پەیوەندییە بازرگانییەکان و داماڵینی باجە گومرگییەکان بکات.